වත්මන් ආණ්ඩුව හැකරුන්ගේ ආණ්ඩුවක් බවට පත්ව ඇති බවත්, රජයේ ප්රධාන මූල්ය පද්ධති රැසකට හැකරුන් ඇතුළු වී ඇති බවත් ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා චෝදනා කරයි.
මුදල් අමාත්යාංශයේ ණය ගෙවන පද්ධතියට හැකරුන් ඇතුළු වීමෙන් රුපියල් කෝටි 80කට අධික මුදලක් අතුරුදහන් වී ඇති බවත්, පෞද්ගලික බැංකු පද්ධතියෙන් රුපියල් බිලියන 13ක් අතුරුදහන් වී ඇති බවත් මන්ත්රීවරයා පෙන්වා දෙයි. මීට අමතරව ගල් අඟුරු ගනුදෙනු, තැපැල් දෙපාර්තමේන්තුව සහ වරාය පද්ධතියට ද හැකරුන්ගේ බලපෑම එල්ල වී ඇති අතර වරායෙන් බහාලුම් 323ක් පමණ රැගෙන ගොස් ඇති බවට ද ඔහු චෝදනා කළේය.
ආණ්ඩුවේ නවතම සැලසුම අනුව සෑම ප්රාදේශීය ලේකම් කාර්යාලයකටම හැකර්වරයෙකු බැගින් පත් කිරීමට සූදානම් වන බවට බරපතළ අනාවරණයක් කළ රාජපක්ෂ මහතා, පැරණි ‘පික්පොකට්’ න්යාය දැන් ‘හැකර් න්යාය’ දක්වා නවීකරණය වී ඇති බව ප්රකාශ කළේය. මේ හරහා සිදුවන සියලු මූල්ය පාඩුවල බර අවසානයේ රටේ ජනතාවට දැරීමට සිදුවන බවත්, ජනවාරි මාසයේ සිටම මේ පිළිබඳව ජනාධිපතිවරයා දැනුවත් කර තිබුණ ද මෙතෙක් නිසි පියවරක් ගෙන නොමැති බවත් ඔහු වැඩිදුරටත් අවධාරණය කළේය.
