බන්ධනාගාර පද්ධතියකට තාවකාලික පැලැස්තර යෙදීම නතර කර, එම පද්ධතිය ප්රතිසංස්කරණය කිරීමට රජය වහා පියවර ගත යුතු බව ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතා පවසයි. සිය “X” ගිණුමෙහි සටහනක් තබමින් ඒ මහතා මෙම අදහස් පළ කර ඇත.
එහිදී වැඩිදුරටත් අදහස් දැක්වූ නාමල් රාජපක්ෂ මහතා සඳහන් කර ඇත්තේ, සති කිහිපයක් ඇතුළත බන්ධනාගාරයක් තුළ වාර්තා වූ දෙවන ප්රධාන නොසන්සුන්තාවය මෙය වන බැවින්, මෙය තවදුරටත් තනි සිදුවීම් ලෙස බැහැර කළ නොහැකි බවයි. අයහපත් කළමනාකරණය, නොසැලකිලිමත්කම සහ දැඩි පීඩනයකට ලක්ව ඇති බන්ධනාගාර පද්ධතියක සෘජු ප්රතිඵලය මෙය වන බවද හෙතෙම පෙන්වා දී තිබේ.අප හමුවේ මෙවැනි අර්බුදයක් දිගහැරෙමින් පවතිද්දී පවා, අදටත් බන්ධනාගාර දෙපාර්තමේන්තුව පවත්වාගෙන යන්නේ ස්ථිර බන්ධනාගාර කොමසාරිස් ජනරාල්වරයෙකු පත් කර නොමැතිව වීම බරපතළ ගැටළුවක් බවත්, අමතර ආරක්ෂක බලඇණි යෙදවීමෙන් එක් දිනකට තත්ත්වය පාලනය කරගත හැකි වුවද එයින් ගැටලුව නිරාකරණය නොවන බවත් නාමල් රාජපක්ෂ මහතා වැඩිදුරටත් සිය X පණිවිඩය මඟින් අවධාරණය කර ඇත.
