වර්තමාන රජයේ නොහැකියාව සහ වංචාවන් මේ වන විට රට හමුවේ අනාවරණය වෙමින් පවතින බව ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පවසයි. අද (28) තංගල්ලේදී පැවැති වැඩසටහනකින් අනතුරුව මාධ්ය වෙත අදහස් දක්වමින් ඔහු මේ බව සඳහන් කළේය.
මුදල් අමාත්යාංශයේ ඩොලර් මිලියන 2.5ක මුදලක් අස්ථානගත වීම හුදු සයිබර් ප්රහාරයක් (Hacking) නොව සංවිධානාත්මක මූල්ය වංචාවක් බව මන්ත්රීවරයා අවධාරණය කළේය. මෙම වගකීමෙන් මුදල් ලේකම්වරයාට මෙන්ම මුදල් අමාත්යවරයා ලෙස ජනාධිපතිවරයාට ද මිදිය නොහැකි බව ඔහු පෙන්වා දුන්නේය.
අදාළ වංචාව පිළිබඳ තොරතුරු මාස 08ක කාලයක් තිස්සේ ජනතාවගෙන් වසන් කර තැබීමට රජය කටයුතු කර ඇති බවට ඔහු චෝදනා කළේය. මහා බැංකුව පවා මුදල් අමාත්යාංශයෙන් විමසා මෙම ගෙවීම් සිදුකර ඇති බැවින් “හොරා” සිටින්නේ රජය තුළම බව මන්ත්රීවරයා පැවසීය.
වරායෙන් කන්ටේනර් 323ක් නිදහස් කිරීම, බාල ගල් අඟුරු සහ තෙල් නැව් ගෙන්වීම වැනි සිදුවීම් හරහා රජයේ අදූරදර්ශී පාලනය හෙළි වී ඇති බව ඔහු සඳහන් කළේය.
විදේශගත ශ්රී ලාංකිකයින් එවන විදේශ විනිමය මෙන්ම ආපදා සහන සඳහා ලැබුණු ආධාර පවා ආරක්ෂා කර ගැනීමට රජය අපොහොසත් වී ඇති බවට ඔහු වැඩිදුරටත් චෝදනා කළේය.
රජය ලබාදුන් පොරොන්දු ඉටු කරනු වෙනුවට දූෂණ හා වංචා පෝෂණය කරමින් සිය පෞද්ගලික න්යාය පත්රයක් මත කටයුතු කරමින් සිටින බව නාමල් රාජපක්ෂ මහතා මෙහිදී අවධාරණය කළේය.
