අපගේ උදාරතම ජයග්රහණ සැමවිටම අත්කර ගත්තේ සංවර්ධනය සහ ශිෂ්ටාචාරය යන ද්විත්වයම එකිනෙක සුසංයෝගයෙන් ක්රියාත්මක කළ විටදී පමණක් බව ශ්රී ලංකා පොදුජන පෙරමුණේ (SLPP) ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පවසයි. හොංකොංහි පැවති 2026 ආසියානු සංස්කෘතික පොදු සුභසාධන සංසදය පසුගියදා (15) අමතමින් ඔහු මේ බව කියා සිටියේය.
එහිදී අදහස් දැක්වූ නාමල් රාජපක්ෂ මහතා පෙන්වා දුන්නේ වර්තමානය වන විට ගෝලීය ආර්ථික හා දේශපාලන සමබරතාව පෙරදිග දෙසට වේගයෙන් ගමන් කරමින් පවතින බවයි. 2030 වන විට සමස්ත ගෝලීය දළ දේශීය නිෂ්පාදිතයේ (GDP) වර්ධනයෙන් 60%කට පමණ ආසියානු මහාද්වීපය දායක වෙමින් ගෝලීය ආර්ථිකයේ ප්රබලතම ගාමක බලවේගය වනු ඇතැයි අපේක්ෂා කරන බව ද ඔහු සඳහන් කළේය. කෙසේ වෙතත්, මෙම නැඟී සිටීම හමුවේ නවීකරණය නිසා අපගේ අනන්යතාවය දුබල වේද, තාක්ෂණය මනුෂ්යත්වය අභිභවා යයිද සහ ආර්ථික අභිලාෂයන් සොබාදහම විනාශ කරයිද යන ශිෂ්ටාචාරාත්මක ප්රශ්න රැසක් පැනනඟින බව ඔහු පෙන්වා දුන්නේය.
සියවස් විසිපහක ලිඛිත ඉතිහාසයක් ඇති ශ්රී ලංකාවේ ප්රෞඪ ශිෂ්ටාචාරය පිළිබඳව අදහස් දක්වමින් මන්ත්රීවරයා කියා සිටියේ, වසර දෙදහසකට පෙර මෙරට රජවරුන් දැවැන්ත වාරි පද්ධති සහ වැව් ඉදිකරනු ලැබුවේ කීර්තිය තකා නොව ජල හා ආහාර සුරක්ෂිතතාව මෙන්ම මහජන සුභසාධනය සහතික කිරීම සඳහා බවයි. නූතන ලෝකයට අමතක වන ‘තිරසාරත්වය’ යන්න අපගේ ශිෂ්ටාචාරාත්මක උරුමයක් වන අතර, ලංකාවේ අප එය ‘වැවයි, දාගැැබයි, ගමයි, පන්සලයි’ යන සිව්වැදෑරුම් ප්රඥාව ලෙස හඳුන්වන බව ඔහු පැවසීය. වැව මඟින් පොදු සම්පත් ද, ගම මඟින් ජන ජීවිතය ද, දාගැබ මඟින් සාරධර්ම ද, පන්සල මඟින් පොදු දැනුම ද නියෝජනය වන බවත්, තම පියා වන මහින්ද රාජපක්ෂ මහතා වැනි නායකයින් මෙම පෞරාණික සමබරතාවය නූතන ප්රතිපත්තිවලට පරිවර්තනය කරමින් අතීතය අමතක නොකර අනාගතය දෙස බැලූ දූරදර්ශී නායකයෙකු බවත් නාමල් රාජපක්ෂ මහතා වැඩිදුරටත් ප්රකාශ කළේය.
