ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා පවසන්නේ වත්මන් රජය පාස්කු ප්රහාරය පිළිබඳ පරීක්ෂණ සම්පූර්ණයෙන්ම දේශපාලනීකරණය කර ඇති බවයි. අද දින පක්ෂ මූලස්ථානයේ පැවති මාධ්ය හමුවකදී ඒ මහතා මෙම අදහස් පළ කළේය.
වත්මන් රජය පාස්කු ප්රහාරය දේශපාලන වාසි සඳහා භාවිතා කරන බව ඔහු චෝදනා කරයි. විශේෂයෙන්ම ජනතා විමුක්ති පෙරමුණේ (JVP) ජාතික ලැයිස්තුවේ සිටි, එම පක්ෂයට වියදම් කළ බව කියන ඊබ්රාහිම් නැමැත්තා සහ ඔහුගේ දේපල නිදහස් කර ඇති බවත්, සැබෑ වැරදිකරුවන් හංගා වෙනත් අයට ඇඟිල්ල දික් කරන බවත් ඔහු පෙන්වා දුන්නේය.
ගල් අඟුරු වංචාව සම්බන්ධයෙන් විගණකාධිපතිවරියගේ වාර්තාවෙන් කරුණු අනාවරණය වී ඇති බවත් රජය එම වංචාව වසා ගැනීමට නිලධාරීන් පිට වරද පටවන බවත් ඔහු පැවසීය. ජනාධිපතිවරයා පාර්ලිමේන්තුවේදී තුන් වතාවක් අදාළ ඇමතිවරයාව ආරක්ෂා කළ බවට ද ඔහු චෝදනා කළේය.
ලෝකයේ වැඩිම මිලට තෙල් මිලදී ගන්නා රට බවට ලංකාව පත්ව ඇති බව ජාත්යන්තර මාධ්ය වාර්තා කරන බවත්, ආණ්ඩුව ජනතාව මත අසීමිත බදු බරක් පටවා ඇති බවත් ඔහු පැවසීය. පුනර්ජනනීය විදුලිය අඩාල කර “ඩීසල් මාෆියාවක්” පවත්වාගෙන යාමට රජය උත්සාහ කරන බව ද ඔහු සඳහන් කළේය.
මෙවර මැයි දිනය පෝය දිනයක යෙදෙන බැවින් සුපුරුදු පරිදි රැලියක් නොපවත්වන බවත්, ටී.බී. ඉලංගරත්න මහතාගේ පිළිරුව ඉදිරිපිට කම්කරුවන් වෙනුවෙන් ගෞරව දැක්වීමට සහ ආගමික වතාවත්වලට මුල්තැන දීමට පක්ෂය තීරණය කර ඇති බවත් නාමල් රාජපක්ෂ මහතා වැඩිදුරටත් ප්රකාශ කළේය.
