නාසා ආයතනයේ ‘Quesst’ මෙහෙයුමට අදාළව නිපදවන ලද X-59 පර්යේෂණාත්මක ගුවන් යානය, පසුගිය ජූනි 5 වන සිකුරාදා දින සිය ප්රථම සුපර්සොනික් (Supersonic) පියාසර පරීක්ෂණය සාර්ථකව නිම කරමින් ප්රථම වරට ශබ්දයේ වේගය අභිබවා යාමට සමත්ව තිබේ. වාණිජමය ගුවන් ගමන් ක්ෂේත්රයේ නව පෙරළියක් ඇති කිරීම සඳහා සිදුකෙරෙන පරීක්ෂණ මාලාවක සුවිශේෂී සන්ධිස්ථානයක් ලෙස මෙය හඳුන්වා දිය හැකිය.
මිනිත්තු 81ක් පුරා පැවති මෙම ඓතිහාසික පියාසර වාරයේදී, යානය අහස් කුසේ අඩි 43,400ක උසකින් පියාසර කරමින් ‘මැක් 1.1’ (Mach 1.1) ක වේගයක් (පැයට සැතපුම් 713ක් පමණ) අත්පත් කරගැනීමට සමත් විය. මෙහි ඇති සුවිශේෂීම කරුණ වන්නේ යානය ශබ්දයේ වේගය පසුකර යන අවස්ථාවේදී සාමාන්ය සුපර්සොනික් යානාවලින් නිකුත් වන දරුණු ‘සොනික් බූම්’ (Sonic Boom) ශබ්දය වෙනුවට, ඉතා සියුම් හඬක් (Quiet Thump) පමණක් නිකුත් වන පරිදි මෙය සැලසුම් කර තිබීමයි. නාසා ආයතනයේ ප්රධාන පරීක්ෂණ නියමු ජිම් ලෙස් (Jim Less) ප්රකාශ කළේ, යානයේ තිබූ මිනුම් දර්ශක දෙස බැලීමෙන් හැර යානය ශබ්දයේ වේගය පසුකළ බව තමාට ශාරීරිකව කිසිසේත්ම දැනුනේ නැති බවත්, එම පියාසර කිරීම ඉතාමත් සුමටව සිදු වූ බවත්ය.
මෙම පරීක්ෂණ පියාසර වාරය නිරීක්ෂණය කිරීම සඳහා නාසා ආයතනයේ ‘F-15’ වර්ගයේ ලුහුබැඳීමේ ගුවන් යානයක් ද (Chase Plane) ඒ අසලින්ම පියාසර කර තිබේ. X-59 යානයේ මීළඟ ප්රධානතම පියවර වන්නේ අඩි 55,000ක උසින් ‘මැක් 1.4’ ක (පැයට සැතපුම් 925ක) උපරිම වේගයකින් අමෙරිකාවේ ප්රජාවන් කිහිපයකට ඉහළින් පියාසර කරමින්, එම යානයෙන් පොළොව මතුපිටට ඇසෙන ශබ්ද මට්ටම් පිළිබඳව මහජනතාවගෙන් සෘජුවම දත්ත එකතු කිරීමයි. ගොඩබිමට ඉහළින් වාණිජමය සුපර්සොනික් ගුවන් ගමන් ක්රියාත්මක කිරීමට පවතින නීතිමය බාධා ඉවත් කරගැනීම සඳහා මෙම ‘Quesst’ මෙහෙයුමේ දත්ත අනාගතයේදී බෙහෙවින් උපකාරී වනු ඇත.
