මෙම වසරේ (2026) ගතවූ මාස හතරකට ආසන්න කාලය තුළ දිවයින පුරා සීමාවකින් තොරව ඩෙංගු රෝග ව්යාප්තිය ඉහළ ගොස් ඇති අතර, මැයි 18 වනදා වන විට සමස්ත ලංකාවෙන්ම ඩෙංගු රෝගීන් 29,589 දෙනෙකු වාර්තා වී ඇති බව ජාතික ඩෙංගු මර්ධන ඒකකය නිල වශයෙන් ප්රකාශ කරයි. මේ වන විට වෛරසය ආසාදනය වීමෙන් මෙරටින් වාර්තා වී ඇති සමස්ත මරණ සංඛ්යාව 15කි.
ජාතික ඩෙංගු මර්ධන ඒකකයේ ප්රජා වෛද්ය විශේෂඥ ප්රශීලා සමරවීර මහත්මිය මාධ්ය වෙත අදහස් දක්වමින් කියා සිටියේ, මේ වන විට දිවයින පුරා දැඩි අවදානම් සහිත සෞඛ්ය වෛද්ය නිලධාරී (MOH) කොට්ඨාස 39ක් හඳුනාගෙන ඇති බවයි. සමස්ත රෝගීන්ගෙන් වැඩිම පිරිසක් බස්නාහිර පළාතෙන් වාර්තා වන අතර, ඊට අමතරව දකුණු සහ සබරගමුව පළාත්වලින් ද ඉහළ රෝගීන් සංඛ්යාවක් වාර්තා වේ. දැනට දිවයිනේ සියලුම දිස්ත්රික්ක 25ම ආවරණය වන පරිදි රෝගීන් වාර්තා වී ඇති අතර කොළඹ, ගම්පහ, රත්නපුර, මාතර, ගාල්ල, කළුතර සහ මහනුවර යන දිස්ත්රික්කවලින් වැඩිම බලපෑමක් එල්ල වී තිබේ.
පොලිසිය සහ සෞඛ්ය අංශ එක්ව සිදුකරන ලද කීට විද්යාත්මක සමීක්ෂණ (Entomological Surveys) මඟින් අනාවරණය වී ඇත්තේ නිවෙස්වලට වඩා පාසල්, රජයේ ආයතන, පෞද්ගලික සේවා ස්ථාන සහ ආගමික ස්ථාන කේන්ද්ර කරගනිමින් ඩෙංගු මදුරුවන් බෝවීම සහ රෝගය ව්යාප්ත වීම වේගවත්ව සිදුවන බවයි. පවතින වැසි සහිත කාලගුණයත් සමඟ මෙම තත්ත්වය තවදුරටත් දරුණු විය හැකි බැවින්, තමන් අවට පරිසරය පිරිසිදුව තබා ගැනීමට වහාම පියවර ගන්නා ලෙස සෞඛ්ය අංශ මහජනතාවගෙන් හදිසි ඉල්ලීමක් කරයි.
