සමස්ත ලංකා බන්තු රේඛණ ශිල්පීන්ගේ සංගමයේ (Cardiographers) වෘත්තිකයන් මුහුණ දෙන ගැටලු කිහිපයක් සම්බන්ධයෙන් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් සෞඛ්ය අමාත්යාංශයේදී විශේෂ සාකච්ඡාවක් පවත්වා තිබෙනවා. රෝහල් පද්ධතිය තුළ පවතින කාර්ය මණ්ඩල හිඟය, වැටුප් පරිමාණ, නිල නාමයන් සහ පුහුණු කටයුතු පිළිබඳව මෙහිදී දීර්ඝ ලෙස අවධානය යොමු වූ අතර, එම වෘත්තීය ගැටලුවලට සාධනීය විසඳුම් සහ නිශ්චිත එකඟතාවන්ට පැමිණීමට දෙපාර්ශ්වයටම හැකි වුණා.
ඒ අනුව, කාර්ය මණ්ඩල පුරප්පාඩු පිරවීම සඳහා බන්තු රේඛන ශිල්පී පුහුණු පාසල තවදුරටත් වැඩිදියුණු කර, මේ වසර තුළදීම වැඩි ශිල්පීන් සංඛ්යාවකින් යුත් අභ්යාසලාභීන් කණ්ඩායමක් කඩිනමින් බඳවා ගැනීමට තීරණය කෙරුණා. එමෙන්ම, සපුරා ඇති සුදුසුකම් මත දැනට ලබන වැටුප MT-4 පරිමාණයේ සිට MT-6 වැටුප් පරිමාණය දක්වා ඉහළ නැංවීම වෙනුවෙන් වැටුප් කොමිෂන් සභාව සමඟ සාකච්ඡා කර කඩිනම් පියවර ගැනීමට ද එකඟතාව පළ වුණා. වෘත්තීය ගැටලු මඟහැරෙන පරිදි තනතුරු නිල නාමයන් පිළිබඳව තීරණයක් ගැනීමට ‘නිල නාම කමිටුව’ (Title Name Committee) වහාම රැස් කරන ලෙසත්, යෝජිත උපාධි පාඨමාලාව ආරම්භ කිරීමේ පියවර කඩිනම් කරන ලෙසත් අමාත්යවරයා නිලධාරීන්ට උපදෙස් දුන්නා.
මීට අමතරව, දිවයිනේ ප්රධාන රෝහල්වල හෘද රෝග සහ හෘද සැත්කම් ඒකක තුළ පැය 24 පුරා අඛණ්ඩව රෝගී සත්කාරක සේවාවන් සැපයීමේදී පවතින ගැටලු නිරාකරණය කරමින්, එම සේවාව වඩාත් විධිමත් කරන ලෙස ද අමාත්යවරයා නියෝග කළා. සමස්ත හෘද රෝගී සත්කාරක සේවාවන් බිඳවැටීමකින් තොරව උසස් මට්ටමකින් පවත්වාගෙන යාම රජයේ ප්රමුඛතම අරමුණ බව පැවසූ වෛද්ය නලින්ද ජයතිස්ස මහතා, සාධාරණ වෘත්තීය ගැටලුවලට කඩිනම් විසඳුම් දීමට සෞඛ්ය අමාත්යාංශය නිරන්තරයෙන් අවධානය යොමු කරන බව සහතික කළා. රෝගී සත්කාර වෙනුවෙන් සහ තම වෘත්තීය අයිතිවාසිකම් වෙනුවෙන් බලධාරීන් දැක්වූ මෙම සාධනීය ප්රතිචාරය සමස්ත ලංකා බන්තු රේඛන ශිල්පීන්ගේ සංගමයේ ද ඇගයීමට ලක්ව තිබෙනවා.
