මහියංගණ ආසනයේ රිදීමාලියද්ද ප්රදේශයේ දරුවන් සහ තරුණ පරම්පරාවේ ක්රීඩා කෞශල්යයන් වර්ධනය කිරීමේ අරමුණින් රුපියල් මිලියන 80ක වටිනාකමකින් යුත් අංගසම්පූර්ණ ක්රීඩාංගණයක් ඉදිකිරීමට කටයුතු සැලසුම් කර තිබෙනවා. රිදීමාලියද්ද මධ්ය මහා විද්යාලය කේන්ද්ර කරගනිමින් ඉදිකිරීමට නියමිත මෙම සුවිශේෂී ව්යාපෘතිය සඳහා තරුණ කටයුතු හා ක්රීඩා අමාත්යාංශය මඟින් මූල්ය ප්රතිපාදන වෙන් කර ඇති අතර, ව්යාපෘතියට අදාළ විශේෂ ක්ෂේත්ර පරීක්ෂාවක් ජූනි 19 වැනිදා වැවිලි ප්රජා වතු යටිතල පහසුකම් පිළිබඳ අමාත්ය සමන්ත විද්යාරත්න මහතාගේ ප්රධානත්වයෙන් එම විද්යාල පරිශ්රයේදී සිදු කෙරුණා.
මෙම නව සංවර්ධන සැලැස්ම යටතේ ක්රීඩාංගණයේ ඉඩ ප්රමාණය පුළුල් කිරීම, නවීන ධාවන පථ ඉදිකිරීම සහ ප්රවේශ මාර්ග ඇතුළු යටිතල පහසුකම් රැසක් නවීකරණය කිරීමට නියමිතයි. විද්යාලයේ බලධාරීන්, දෙමාපියන් සහ ප්රදේශවාසීන්ගේ අදහස් හා යෝජනා ද ලබාගනිමින්, මෙම සංවර්ධන සැලැස්ම කඩිනමින් අවසන් කර ඉදිකිරීම් කටයුතු ආරම්භ කිරීමට මෙහිදී සාකච්ඡා වී තිබෙනවා. ප්රදේශයේ ක්රීඩා සංවර්ධනය වෙනුවෙන් මෙතරම් විශාල මුදලක් වෙන් කළ පළමු අවස්ථාව මෙය වන අතර, මෙම ව්යාපෘතිය හරහා රිදීමාලියද්ද සහ අවට ප්රදේශවල දක්ෂ ක්රීඩක ක්රීඩිකාවන්ට ජාතික හා ජාත්යන්තර මට්ටමේ අවස්ථා කරා ගමන් කිරීමට ශක්තිමත් පදනමක් ලැබෙනු ඇතැයි අපේක්ෂා කරනවා.
