රාජ්ය පරිපාලන පද්ධතිය තුළ කාර්යක්ෂමතාව, විනිවිදභාවය සහ වගකීම් සහගත බව තහවුරු කරමින් දූෂණයෙන් තොර සුපිළිපන් රාජ්ය සේවාවක් උදෙසා අභ්යන්තර කටයුතු ඒකකවල විශිෂ්ටතාව ඇගයීමට ලක් කෙරෙන “ජාතික සුපිළිපන් සම්මාන – 2026” ප්රකාශයට පත් කිරීමේ විශේෂ වැඩසටහන පසුගියදා ජනාධිපති ලේකම් කාර්යාලයේදී පැවැත්විණි.
අල්ලස හා දූෂණයෙන් තොර පරිපාලන ව්යුහයක් උදෙසා කැපවන රාජ්ය ආයතනවල අභ්යන්තර කටයුතු ඒකක ඇගයීම සහ ආදර්ශමත් ක්රියාකාරකම් සමාජගත කරමින් රාජ්ය අංශය තුළ සුපිළිපන් සංස්කෘතියක් ප්රවර්ධනය කිරීම මෙම සම්මාන උළෙලේ ප්රධාන අරමුණ වේ.
මෙම සම්මාන තරඟාවලිය සඳහා රාජ්ය ආයතනවල පිහිටුවා ඇති සියලුම අභ්යන්තර කටයුතු ඒකකවලට ප්රධාන කාණ්ඩ පහක් යටතේ අයදුම් කළ හැකිය. ඒ අනුව අන්තර් අමාත්යාංශ (මධ්යම රජයේ අමාත්යාංශ සහ පළාත් ප්රධාන ලේකම් කාර්යාල), පළාත් සභා අමාත්යාංශ, රජයේ දෙපාර්තමේන්තු (මධ්යම/පළාත් දෙපාර්තමේන්තු, දිස්ත්රික් ලේකම් කාර්යාල, සේවකයින් 51ක් හෝ ඊට වැඩි අනු කාර්යාල), ප්රාදේශීය ලේකම් කාර්යාල සහ රජය සතු ව්යවස්ථාපිත ආයතන (රාජ්ය සංස්ථා, මණ්ඩල සහ අනෙකුත් ව්යවස්ථාපිත ආයතන) සඳහා මෙලෙස තරඟ වැදීමට අවස්ථාව හිමිවේ.
ස්ථානීය පරීක්ෂාවේදී ලබාගන්නා ලකුණු මට්ටම් මත පදනම්ව එක් එක් කාණ්ඩය යටතේ වැඩිම ලකුණු ලබන ආයතන සඳහා ස්වර්ණ සම්මානයත්, දෙවනුව වැඩිම ලකුණු ලබන ආයතන සඳහා රිදී සම්මානයත්, තෙවනුව වැඩිම ලකුණු ලබන ආයතන සඳහා ලෝකඩ සම්මානයත් සහතික පත් සමඟ පිරිනැමීමට කටයුතු යොදා ඇත. තරඟාවලියේ ප්රතිඵල 2026 නොවැම්බර් මාසයේදී නිකුත් කිරීමට නියමිත අතර, ජාත්යන්තර දූෂණ විරෝධී දිනයට සමගාමීව 2026 දෙසැම්බර් 09 වන දින සම්මාන උළෙල පැවැත්වීමට නියමිතය.
