වැලිවිට පිණ්ඩපාතික අසරණ සරණ සරණංකර සංඝරාජයන් වහන්සේගේ ජන්ම දිනය තේමා කරගනිමින් වාර්ෂිකව පවත්වනු ලබන “ජාතික පිරිවෙන් දින රාජ්ය මහෝත්සවය” මෙවර මහනුවරදී පැවැත්වීමට කටයුතු සංවිධානය කර ඇති බව පිරිවෙන් අධ්යක්ෂ පූජ්ය මාදෝවිට වජිරබුද්ධි ස්වාමින් වහන්සේ ප්රකාශ කරති. උන්වහන්සේ මේ බව පැවසුවේ අද (12) රජයේ ප්රවෘත්ති දෙපාර්තමේන්තුවේදී පැවැති “ජාතික පිරිවෙන් දින රාජ්ය මහෝත්සවය – 2026” පිළිබඳ දැනුවත් කිරීමේ මාධ්ය සාකච්ඡාවට එක්වෙමිනි.
පිරිවෙන් අධ්යාපන මණ්ඩලය, අධ්යාපන අමාත්යාංශයේ පිරිවෙන් ශාඛාව සහ සමස්ත ලංකා කෘත්යාධිකාරී පරිවේණාධිපති සංගමය එක්ව 2007 වසරේදී මෙම පිරිවෙන් දිනය ප්රකාශයට පත් කරගත් අතර, මෙවර උත්සවයේදී විශේෂ පිරිවෙන් ජාතික ගීයක් සහ පිරිවෙන් කොඩියක් ද නිර්මාණය කරමින් උත්සවය පැවැත්වීමට සියලු කටයුතු සූදානම් කර තිබේ.
මෙරට බෞද්ධ අධ්යාපනය නැවත ස්ථාපනය කරමින්, උපසම්පදාව ඇති කර ධර්මධර, විනයධර යතිවරයාණන් වහන්සේලා බිහිකිරීමේ පුරෝගාමී මෙහෙවරක් ඉටුකළ වැලිවිට සරණංකර සංඝරාජයන් වහන්සේට උපහාරයක් වශයෙන් උන්වහන්සේගේ ජන්ම දිනය මෙලෙස ජාතික පිරිවෙන් දිනය ලෙස නම්කර සඟරජ බුහුමන් පවත්වන බව පිරිවෙන් අධ්යක්ෂ වජිරබුද්ධි ස්වාමින් වහන්සේ වැඩිදුරටත් සඳහන් කළහ.
