පැල්මඩුල්ල වත්තේ නීලගමම් පළමු කොටසේ වතු කම්කරු ජනතාවගේ නිවාස ඇතුළු යටිතල පහසුකම් සැලසීම කඩිනම් කරන්නැයි වතු පාලනාධිකාරියට දැනුම් දුන් බව වතු යටිතල පහසුකම් හා ප්රජා සංවර්ධන නියෝජ්ය ඇමැති සුන්දරලිங்கம் ප්රදීප් මහතා පැවසීය. අමාත්යාංශයේ කැඳවා තිබූ මාධ්ය හමුවකට එක්වෙමින් නියෝජ්ය ඇමැතිවරයා මේ බව කියා සිටියේය.
ඇමැති සමන්ත විද්යාරත්න මහතා විසින් වතු පාලනාධිකාරිය කැඳවා මෙම උපදෙස් දුන් බවත්, වතු ජනතාව පීඩාවට පත් කිරීමට ආරක්ෂක කණ්ඩායම් යොදා නොගත යුතු බවට දැනුම් දුන් බවත් ඔහු කීවේය. නීලගමම් පළමු කොටසේ පදිංචි පුද්ගලයකු වතු ජනතාව වෙනුවෙන් වෙන් කර තිබූ ඉඩමක නිවසක් ඉදිකිරීමට වතු බලධාරීන්ගෙන් අවසර ඉල්ලා සිටියද එය නොලැබීම හේතුවෙන් තාවකාලික පැලක් ඉදිකර තිබුණි.
පසුව කහවත්ත පොලීසියට පැමිණිල්ලක් කර තිබූ අතර පොලීසිය පරීක්ෂණයට පැමිණීමට පෙර කළු පැහැති ඇඳුමින් සැරසුණු පිරිසක් පැමිණ එම තාවකාලික පැල කඩා දමා එහි සිටි වතු තරුණයන්ට දරුණු ලෙස පහර දී තිබේ. මේ පිළිබඳව අගතියට පත් තරුණයන් දුරකථනයෙන් දැනුම් දීමෙන් පසු නියෝජ්ය ඇමැතිවරයා විසින් කහවත්ත පොලිස් ස්ථානාධිපතිවරයා සහ පළාත් නියෝජ්ය පොලිස්පතිවරයා අමතා ජනතාවට ආරක්ෂාව සපයන ලෙස හා පහරදීමට සම්බන්ධ පිරිස අත්අඩංගුවට ගන්නා ලෙස දැනුම් දී ඇත.
ඒ අනුව එදින රාත්රියේම ප්රහාරයට සම්බන්ධ පුද්ගලයන් 9 දෙනෙකු අත්අඩංගුවට ගෙන ඇත. අදාළ වතු පාලනාධිකාරියේ විධායක නිලධාරියා වහා කැඳවා සාකච්ඡා කළ අතර එහිදී ඔවුන් වතු ජනතාවට අවශ්ය පහසුකම් හා සහන සලසන්නට එකඟතාවකට පත් විය.
