මීගමුව බන්ධනාගාරයේ පසුගියදා සිදුවූ අවාසනාවන්ත ගැටුම්කාරී සිද්ධියේදී, බන්ධනාගාර ප්රධාන දොර කවුළුවෙන් ඇතුළට වෙඩි තබා මහා විනාශයක් වළක්වා ගැනීමට කටයුතු කළ බන්ධනාගාර නියාමකවරයා වෙනත් බන්ධනාගාරයකට ස්ථාන මාරු කර තිබේ.
එම නිලධාරියාගේ ආරක්ෂාව පිළිබඳව දැඩි අවධානය යොමු කරමින් මෙම තීරණය ගෙන ඇති අතර, ඒ අනුව ඔහු මහනුවර ප්රදේශයේ බන්ධනාගාරයක් වෙත ස්ථාන මාරු කර ඇත. ඔහු මහනුවර බන්ධනාගාරය තුළ ඇතුළත රාජකාරී සඳහා පමණක් යොදවනු ඇතැයි වාර්තා වේ.
මීගමුව බන්ධනාගාරය තුළ ඇති වූ ගැටුම්කාරී තත්ත්වය පාලනය කිරීමට ඔහු ගත් එම පියවර හේතුවෙන් ඔහුට රැඳවියන්ගෙන් මෙන්ම පිටත පුද්ගලයන්ගෙන් ද මරණ තර්ජන එල්ල වී තිබිණි. මීට පෙර වැලිකඩ බන්ධනාගාරයේදී ජීවිතක්ෂයට පත් වූ නිලධාරීන්ට ගෞරව දැක්වීමේ අවස්ථාවට සහභාගී වූ බන්ධනාගාර නිලධාරීන්, අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර මහතාගෙන් ඉල්ලා සිටියේ එම නිලධාරියාව ආරක්ෂා කරන ලෙසයි.
පසුගිය 5 වැනිදා ආරම්භ වී 6 වැනිදා උග්ර වූ මීගමුව බන්ධනාගාරයේ ගැටුමෙන් බන්ධනාගාර නිලධාරීන් 8 දෙනෙකු ඇතුළු පුද්ගලයන් 29 දෙනෙකු ජීවිතක්ෂයට පත් වූ අතර, තවත් සියයකට ආසන්න පිරිසක් තුවාල ලැබූහ. බරපතල තුවාල ලැබූ නිලධාරීන් කිහිප දෙනෙකු තවමත් රෝහල්ගතව ප්රතිකාර ලබමින් සිටිති.
