නේපාලයේ ගෝර්කා දිස්ත්‍රික්කයේ උප ගංගාවකින් ආරම්භ වූ හදිසි ගංවතුර තත්ත්වයක් හේතුවෙන් බුධිගන්ධකි ගංගා ධාරාවේ පහළ ප්‍රදේශවල දැඩි අවදානම් සහගත වාතාවරණයක් මතුව ඇති බව කත්මණ්ඩු නුවර පිහිටි ශ්‍රී ලංකා තානාපති කාර්යාලය නිල වශයෙන් නිවේදනය කරයි. අද පූර්වාහ්න 6:00 ට පමණ වාර්තා වූ මෙම ආපදා තත්ත්වයත් සමඟ ගෝර්කා, ධාඩිං, නුවාකොට් සහ චිට්වාන් යන දිස්ත්‍රික්කවල මෙන්ම අදාළ ගංගා නිම්න ආශ්‍රිතව වෙසෙන සහ සංචාරය කරන සියලුම ශ්‍රී ලාංකිකයන්ට වහාම ක්‍රියාත්මක වන පරිදි උපරිම ආරක්ෂිත පියවර අනුගමනය කරන ලෙස රාජ්‍ය තාන්ත්‍රික මට්ටමින් දැඩි ලෙස අවධාරණය කර ඇත.
මෙම හදිසි අනතුරු ඇඟවීමත් සමඟ ගංගා, පාලම් සහ පහත් බිම් ආශ්‍රිත සංචාර සම්පූර්ණයෙන්ම අත්හිටුවන ලෙසත්, ප්‍රදේශයේ ආරක්ෂක අංශ සහ සංචාරක පොලිසිය ලබා දෙන මාර්ගෝපදේශ තදින්ම පිළිපදින ලෙසත් උපදෙස් දී තිබේ. තත්ත්වය සාමාන්‍ය අතට පත්වන තෙක් අනවශ්‍ය ගමන් බිමන්වලින් වැළකී සුරක්ෂිත ස්ථානවල රැඳී සිටින ලෙස දැනුම් දෙන තානාපති කාර්යාලය, ගංවතුරට ලක්වූ මාර්ග හෝ ඇළ දොළ හරහා යාමට උත්සාහ නොකරන ලෙසත්, ප්‍රාදේශීය බලධාරීන්ගේ උපදෙස් මත වහාම උස් භූමි වෙත යොමු වන ලෙසත් දන්වා සිටියි. එමෙන්ම, අදාළ අවදානම් දිස්ත්‍රික්ක වෙත සංචාරය කිරීමට සැලසුම් කර ඇති පුද්ගලයන්ට නිල තහවුරු කිරීම් ලබෙන තෙක් එම ගමන් කල්දමන ලෙසද දැනුම් දෙයි.
නේපාලයේ සිටින ශ්‍රී ලාංකිකයන්ගේ ආරක්ෂාව තහවුරු කිරීම සඳහා කත්මණ්ඩු හි ශ්‍රී ලංකා තානාපති කාර්යාලය පැය 24 පුරාම ක්‍රියාත්මක හදිසි සම්බන්ධීකරණ සේවාවක් ආරම්භ කර ඇත. ඒ අනුව +9779851048653 යන ක්ෂණික ඇමතුම් අංකය සහ [email protected] යන විද්‍යුත් තැපෑල ඔස්සේ ඕනෑම මොහොතක තානාපති කාර්යාලය, අදාළ හෝටල් සහ සංචාරක ඒජන්සි සමඟ නිරන්තර සන්නිවේදනය පවත්වා ගැනීමට පහසුකම් සලසා තිබේ.
