ලොව ප්රමුඛතම වීඩියෝ ප්රවාහන සේවාවක් වන නෙට්ෆ්ලික්ස් සමාගමේ දකුණු කොරියානු ශාඛාව එරට බදු බලධාරීන්ට එරෙහිව පවරා තිබූ දීර්ඝකාලීන බදු නඩුවකින් විශිෂ්ට ජයග්රහණයක් ලබා ගැනීමට සමත් වී තිබේ. දකුණු කොරියානු බදු බලධාරීන් විසින් නෙට්ෆ්ලික්ස් සමාගම වෙත පනවා තිබූ වොන් බිලියන 76.2ක ආයතනික බදු මුදලින් වොන් බිලියන 68.7ක මුදලක් අවලංගු කිරීමට සෝල් පරිපාලන අධිකරණය අද දින නියෝග කළේය. නෙට්ෆ්ලික්ස් කොරියානු ශාඛාව සිය ඕලන්ද ශාඛාව වෙත ගෙවනු ලබන මුදල් ‘කර්තෘභාග’ ලෙස සලකා බදු අය කළ යුතු බව කොරියානු බදු බලධාරීන්ගේ තර්කය වුවද එම ගෙවීම් හුදෙක් තාක්ෂණික සේවා සඳහා ලබාදෙන ව්යාපාරික ආදායම් පමණක් බව නෙට්ෆ්ලික්ස් සමාගම තර්ක කළේය.
නෙට්ෆ්ලික්ස් සමාගමේ තර්කය පිළිගත් අධිකරණය ප්රකාශ කළේ අන්තර්ගතයන් ගබඩා කිරීම සහ සම්ප්රේෂණය කිරීම වැනි මූලික කාර්යයන් සිදු කරන්නේ විදේශීය ශාඛාව මගින් බැවින් එම ගෙවීම් සේවා වන්දියක් ලෙස සැලකිය යුතු බවයි. දකුණු කොරියාව සහ නෙදර්ලන්තය අතර පවතින බදු ගිවිසුම් අනුව මෙවැනි ගනුදෙනු සඳහා දකුණු කොරියාවට බදු අය කිරීමේ අයිතියක් නොමැති බව අධිකරණය වැඩිදුරටත් පෙන්වා දුන්නේය. මෙම තීන්දුවෙන් පසු අදහස් දැක්වූ නෙට්ෆ්ලික්ස් සමාගම තමන් සැමවිටම කොරියාවේ බදු නීතිවලට අනුකූලව කටයුතු කරන බවත් එරට නිර්මාණාත්මක ක්ෂේත්රය වෙනුවෙන් දිගුකාලීන ආයෝජන අඛණ්ඩව ලබාදෙන බවත් අවධාරණය කළේය. මෙම තීන්දුව දකුණු කොරියාවේ ක්රියාත්මක වන අනෙකුත් බහුජාතික තාක්ෂණික සමාගම්වල බදු ක්රියාවලීන් සඳහා ද සුවිශේෂී පූර්වාදර්ශයක් වනු ඇතැයි ආර්ථික විශේෂඥයෝ පෙන්වා දෙති.
