විදේශගත ශ්රී ලාංකිකයන්ගේ අයිතිවාසිකම් සහ සුරක්ෂිතතාව තවදුරටත් ශක්තිමත් කිරීම අරමුණු කරගනිමින් සකස් කළ නව විදේශ රැකියා පනත කඩිනමින් පාර්ලිමේන්තුවට ඉදිරිපත් කරන බව විදේශ කටයුතු, විදේශ රැකියා හා සංචාරක අමාත්ය විජිත හේරත් මහතා ප්රකාශ කළේය.
අමාත්යවරයා අද (09) පාර්ලිමේන්තුවේදී වැඩිදුරටත් අවධාරණය කළේ, විදේශගත ශ්රමිකයන් වෙනුවෙන් පහත සඳහන් වැඩපිළිවෙළ ක්රියාත්මක කෙරෙන බවයි:
විදේශගත ශ්රී ලාංකිකයන්ට ඡන්ද අයිතිය ලබාදීම සඳහා අවශ්ය ක්රමවේදය සකස් කරමින් පැවතීම සහ ඔවුන් වෙනුවෙන් දායක විශ්රාම වැටුප් ක්රමයක් හඳුන්වාදීමේ මූලික කටයුතු සිදු කෙරෙමින් පවතින බව ඔහු පැවසීය. ලෝකයේ ඕනෑම ස්ථානයක සිට තම ගැටලු ඉදිරිපත් කළ හැකි “Lanka Konnect” වෙබ් අඩවිය සහ ජංගම දුරකථන යෙදුම දැනටමත් හඳුන්වාදී ඇත.
විදේශ රැකියා ඒජන්සි සම්බන්ධ ජාවාරම් සහ අල්ලස් ලබාගැනීම් නතර කිරීමට CID නිලධාරීන් ඇතුළත් විශේෂ විමර්ශන ඒකකයක් මඟින් නීතිය දැඩිව ක්රියාත්මක වේ. විශේෂයෙන්ම රුපියල් ලක්ෂ 40ත් 45ත් අතර මුදල් ඉල්ලා ජනතාව රවටන ජාවාරම්කරුවන්ට මුදල් නොගෙවන ලෙස අමාත්යවරයා ජනතාවගෙන් ඉල්ලා සිටියේය. ඊශ්රායල රැකියා සඳහා පුද්ගලික ආයතනයකට අය කළ හැක්කේ උපරිම වශයෙන් මාසික වැටුප මෙන් දෙගුණයක් පමණක් බවද ඔහු සිහිපත් කළේය.
මියයන විදේශගත ශ්රමිකයන්ගේ පවුල් සඳහා ලබාදෙන වන්දි මුදල රුපියල් ලක්ෂ 6 සිට ලක්ෂ 20 දක්වා ඉහළ නංවා ඇත.
රටේ ආර්ථිකය සම්බන්ධයෙන් අදහස් දැක්වූ අමාත්යවරයා, රජය බලයට පත්වූ පළමු වසර තුළ ඉතිහාසයේ වැඩිම විදේශ ප්රේෂණ ලෙස ඇමරිකානු ඩොලර් බිලියන 8ක් රටට ලැබී ඇති බවත්, 2026 වසරේ ගතවූ මාස හය තුළදී පමණක් ඩොලර් බිලියන 4.75ක ප්රේෂණ ලැබී ඇති බවත් සඳහන් කළේය.
ජපානය සමඟ ඇතිකරගත් නව ගිවිසුම් මඟින් ට්රක් රථ රියදුරන්, ඉදිකිරීම් ක්ෂේත්රයේ ශ්රමිකයන් සහ උපාධිධාරීන් සඳහා නව රැකියා අවස්ථා විවෘත වී ඇති අතර, ඉතාලියේ සාමාන්ය රියදුරු බලපත්ර සම්බන්ධ ගැටලුවද විසඳා ඇත. මීට අමතරව, උතුරු පළාතේ තරුණ තරුණියන් වෙනුවෙන් නව වෘත්තීය පුහුණු මධ්යස්ථානයක්ද කඩිනමින් ස්ථාපිත කරන බව අමාත්යවරයා වැඩිදුරටත් පැවසීය.
