ඩොලරයේ අගය ඉහළ යාම මත පදනම්ව රටේ පාලනය වෙනස් කිරීමේ අදහසක් ඇතැම් පාර්ශ්ව තුළ තිබිය හැකි බවත්, එවැනි අවස්ථාවක රට භාර දීමට සුදුසු වෙනත් නායකයෙකු ඔවුන් අතර සිටීදැයි බිමල් රත්නායක මහතා ප්රශ්න කර සිටිනවා. ඔහු මෙම අදහස් පළ කළේ මෑතකදී පැවති ජන හමුවක් අමතමිනි.
පසුගිය කාලයේ ඩොලරයේ අගය ඉහළ යන විට ඇතැම් පිරිස් එය ඉතා උනන්දුවෙන් නිරීක්ෂණය කළ බවත්, නමුත් වත්මන් රජය ගෙන යන නිවැරදි වැඩපිළිවෙළ හේතුවෙන් මේ වන විට ඩොලරයේ අගය රුපියල් 334 දක්වා පහත වැටී ඇති බවත් ඔහු පෙන්වා දුන්නා.
තවද, ජාත්යන්තර මූල්ය අරමුදල මගින් මෙරටට ලැබීමට නියමිත ඩොලර් මිලියන 700ක මුදල මෙම මස 27 වනදායින් පසුව ලැබෙනු ඇතැයි රජය අපේක්ෂා කරන බවත්, එම මුදල් ලැබීමත් සමඟ ඩොලරයේ අගය තවදුරටත් පහත වැටෙනු ඇති බවත් රත්නායක මහතා විශ්වාසය පළ කළා. රටේ පාලනය සජිත් ප්රේමදාස, නාමල් රාජපක්ෂ හෝ දිලිත් ජයවීර වැනි නායකයින් වෙත භාර දීමේ හැකියාව සහ එහි ප්රතිඵල පිළිබඳව ඔහු මෙහිදී ප්රශ්න කළේ වත්මන් පාලනය යටතේ සිදු වෙමින් පවතින ආර්ථික ස්ථාවරත්වය අවධාරණය කරමින්.
