හැටන්, දික්ඔය නගරයේදී අඹුසැමි යුවළක් අමානුෂික ලෙස ඝාතනය කර, කාන්තාව පැළඳ සිටි පවුම් 18ක ස්වර්ණාභරණ කොල්ලකා පලාගිය ප්රධාන සැකකරු එළඹෙන ජූනි මස 03 වැනිදා දක්වා රක්ෂිත බන්ධනාගාර ගත කිරීමට හැටන් දිසා විනිසුරු සහ මහේස්ත්රාත් පීටර් පෝල් මහතා අද (24) නියෝග කළේය.
මෙසේ රක්ෂිත බන්ධනාගාර ගත කෙරුණේ හාලිඇල, දෙමෝදර ප්රදේශයේ පදිංචිව සිටි “සෙල්ලයියා මනෝජ්” නැමැති 47 හැවිරිදි එක්දරු පියෙකි.
භීෂණකාරී ඝාතනයේ සහ විමර්ශනවල විස්තර මෙසේය:
ඝාතනය සහ සැඟව සිටි ස්ථානය:
සැකකරු ඉකුත් (21) වැනිදා දික්ඔය නගරයේ පිහිටි නිවස තුළදී මෙම ද්විත්ව ඝාතනය සිදුකර පලාගොස් තිබුණි. අනතුරුව ඔහු බගවන්තලාව, පෙට්රෝසෝ වතුයායේ රහසිගතව සැඟව සිටියදී, බගවන්තලාව සහ හැටන් පොලිස් ස්ථානවල නිලධාරීන් ඒකාබද්ධව දියත් කළ විශේෂ මෙහෙයුමකදී ඊයේ (23) දින අත්අඩංගුවට ගැනීමට සමත් විය.
නඩු භාණ්ඩ සොයාගැනීම:
ඝාතනය සිදුකිරීමෙන් පසු සැකකරු විසින් පැහැරගෙන ගොස් තිබූ පවුම් 18ක ස්වර්ණාභරණ සියල්ලම සොයාගැනීමට හැටන් පොලිසිය සමත්ව ඇත. මීට අමතරව, අඹුසැමි යුවළ ඝාතනය කිරීම සඳහා සැකකරු විසින් යොදාගන්නා ලද ලේ තැවරුණු යකඩ පොල්ලක් සහ තියුණු ආයුධයක් ද විමර්ශන නිලධාරීන් විසින් නඩු භාණ්ඩ ලෙස පොලිස් භාරයට ගෙන තිබේ.
හැටන් මූලස්ථාන පොලිසිය සිද්ධිය සම්බන්ධයෙන් වැඩිදුර විමර්ශන මෙහෙයවයි.
