මැදපෙරදිග කලාපයේ හටගෙන ඇති දරුණු යුද ගැටුම් හේතුවෙන් ගෝලීය ආර්ථිකයට සහ බලශක්ති ක්ෂේත්රයට එල්ල වී ඇති දැඩි පීඩනය හමුවේ, ඇමෙරිකානු ඩොලරයට සාපේක්ෂව ඉන්දීය රුපියල ඇතුළු ලොව ප්රමුඛ පෙළේ මුදල් ඒකක රැසක් බරපතළ ලෙස අවප්රමාණය වී තිබේ.
ජාත්යන්තර මූල්ය වාර්තාවලට අනුව, මෙම අර්බුදය හමුවේ දරුණුතම කඩා වැටීම සටහන් කර ඇත්තේ ඊජිප්තු පවුම වන අතර එය පසුගිය පෙබරවාරි මස අවසානයට සාපේක්ෂව සියයට 10.8කිනුත්, ඉන්දීය රුපියල සියයට 5.9කිනුත් අවප්රමාණය වී ඇත.
පවතින නොසන්සුන්තා මැද හෝර්මුස් සමුද්ර සන්ධිය වසා දැමීමට පියවර ගැනීමත් සමඟ ලෝක වෙළෙඳපොළේ බොරතෙල් මිල ශීඝ්රයෙන් ඉහළ යාම මෙම මූල්ය කඩාවැටීමට ප්රධානතම හේතුව වී තිබේ. පෙබරවාරි මස 28 වැනිදා වන විට ඇමෙරිකානු ඩොලරයකට සාපේක්ෂව ඉන්දීය රුපියලේ අගය 91 සීමාවේ ස්ථාවරව පැවතිය ද, වත්මන් බලශක්ති අර්බුදය හමුවේ එය අද වන විට ඉතිහාසගත මට්ටමකින් පහත වැටෙමින් ඩොලරයට සාපේක්ෂව රුපියල් 96යි ශත 39ක් දක්වා දුර්වල වී ඇත.
චලනය වන විනිමය පීඩනය පාලනය කිරීම සඳහා ඉන්දීය රිසව් බැංකුව (RBI) විදේශ විනිමය වෙළෙඳපොළ වෙත අඛණ්ඩව ඩොලර් මුදා හරිමින් සෘජු මැදිහත්වීම් සිදුකරමින් සිටී. මීට අමතරව, රට තුළ වෙළෙඳ ශේෂය සහ විදේශ විනිමය සංචිත තවදුරටත් ආරක්ෂා කරගැනීමේ තාවකාලික පියවරක් ලෙස, අත්යවශ්ය නොවන සුඛෝපභෝගී භාණ්ඩ මෙන්ම රන් සහ රිදී වැනි වටිනා ලෝහ වර්ග රට තුළට ආනයනය කිරීම සීමා කිරීමට ද ඉන්දීය රජය හදිසි තීරණයක් ගෙන තිබේ.
