රටේ පවතින ආර්ථික අභියෝග හමුවේ සාම්ප්රදායික රැකියා පසුපස හඹායන තරුණ තරුණියන්ට තමන්ගේම කියා සාර්ථක සහ ස්ථාවර ව්යාපාරික අධිරාජ්යයක් ගොඩනැගීමට මඟ පාදන සුවිශේෂී ව්යවසායකත්ව සහ ප්රායෝගික පුහුණු වැඩසටහනක් දකුණු පළාත කේන්ද්ර කරගනිමින් සාර්ථකව පවත්වා තිබේ. දකුණු පළාතේ ව්යවසායකත්වය, නවෝත්පාදනය සහ අගය එකතු කළ කෘෂි නිෂ්පාදන සංවර්ධනය ප්රවර්ධනය කිරීමේ අරමුණින්, රුහුණ විශ්වවිද්යාලයේ (University of Ruhuna) මාපලාන කෘෂිකර්ම පීඨයේ හාර්වෙස්ට් මධ්යස්ථානය (HARVEST Center) මගින් මෙම කාලෝචිත වැඩසටහන සංවිධානය කර තිබුණි. තරුණ ප්රජාව සතු සැඟවුණු කුසලතා ඔප්නංවමින්, කෘෂි අංශයෙන් රටට ඩොලර් ගෙන ආ හැකි නවතම ව්යාපාරික අවස්ථා පිළිබඳව තරුණ තරුණියන්ව සන්නද්ධ කිරීම මෙහි ප්රධාන අරමුණ වී තිබේ.
මෙම අගනා පුහුණු වැඩසටහන මෙහෙයවනු ලැබුවේ ක්ෂේත්රයේ ප්රවීණයෙකු වන මහාචාර්ය නීලන්ත ලියනගේ මහතා විසින් වන අතර, එහිදී මෙරට බහුලව පවතින අඹ පලතුර ආශ්රිතව ඉහළ වෙළඳපොළ වටිනාකමක් සහිත අගය එකතු කළ නිෂ්පාදන නිපදවන ආකාරය පිළිබඳව න්යායාත්මක හා ප්රායෝගික දැනුම පූර්ණ වශයෙන් ලබා දෙන ලදී. ඒ අනුව අඹ ජෑම්, කෝඩියල්, ජූස්, චට්නි මෙන්ම ජාත්යන්තර වෙළඳපොළේ ඉහළ ඉල්ලුමක් පවතින වියළි අඹ (Dried Mango) ඇතුළු නවීන නිෂ්පාදන රැසක් නිවැරදි ප්රමිතියෙන් යුතුව සකස් කරන ආකාරය පිළිබඳව සිසුන්ට මෙහිදී වටිනා පුහුණුවක් හිමිවිය. මීට අමතරව “ව්යවසායකයෙකු වන්නේ කෙසේද” යන තේමාව යටතේ ව්යාපාර සැලසුම්කරණය, නූතන වෙළඳපොළ හඳුනාගැනීම, නිෂ්පාදනවල ගුණාත්මකභාවය ආරක්ෂා කිරීම, පාරිභෝගික විශ්වාසය දිනාගැනීම සහ ස්වයං රැකියා අවස්ථා සාර්ථකව ජයගන්නා ආකාරය පිළිබඳවද දීර්ඝ වශයෙන් තරුණ ප්රජාව දැනුවත් කිරීමට මහාචාර්යවරයා පියවර ගත්තේය.
මාපලාන කෘෂිකර්ම පීඨයේ හාර්වෙස්ට් මධ්යස්ථානයේදී පැවැත්වුණු මෙම වැඩසටහන සඳහා කෘෂි ආශ්රිත ස්වයං රැකියා සහ නව ව්යාපාර ආරම්භ කිරීමට දැඩි උනන්දුවක් දක්වන දකුණු පළාතේ තරුණ තරුණියන් විශාල පිරිසක් සහභාගී වී සිටියහ. තරුණ ව්යවසායකයින් බිහිකිරීම සහ දේශීය කෘෂි නිෂ්පාදන සඳහා ඉහළ අගයක් එකතු කිරීම (Value Addition) තුළින් මෙරට ග්රාමීය ආර්ථිකය ශක්තිමත් කිරීමේ මෙම සාර්ථක ප්රයත්නය, රටේ අනාගත ව්යාපාරික ක්ෂේත්රයේ දැවැන්ත හැරවුම් ලක්ෂ්යයක් වනු නිසැකය. තමන්ගේම ව්යාපාරයක් ආරම්භ කර ආර්ථික වශයෙන් ස්වාධීන වීමට බලාපොරොත්තු වන තරුණ පරපුරට විශ්වවිද්යාල පද්ධතියෙන් ලැබුණු මෙම දායකත්වය සමස්ත සමාජයේම ඉහළ ඇගයීමට ලක්වෙමින් පවතී.
