ශ්රී ලංකා – කියුබානු පාර්ලිමේන්තු මිත්රත්ව සංගමයේ සභාපති, තරුණ කටයුතු හා ක්රීඩා අමාත්ය සුනිල් කුමාර ගමගේ මහතා ඇතුළු එම සංගමයේ විධායක සාමාජිකයන් සහ ශ්රී ලංකාවේ කියුබානු ජනරජයේ තානාපතිනි පැට්රීෂියා ලාසාරා පෙගෝ ගුවේරා (Patricia Lázara Pego Guerra) මහත්මිය අතර විශේෂ නිල සාකච්ඡාවක් පසුගියදා (20) පාර්ලිමේන්තු සංකීර්ණයේදී පැවැත්වුණි. මෙහිදී දෙරට අතර පවතින දිගුකාලීන රාජ්ය තාන්ත්රික සබඳතා ඉදිරියටත් වඩාත් ඵලදායී ලෙස ශක්තිමත් කරගැනීම පිළිබඳව දීර්ඝ වශයෙන් අවධානය යොමු කෙරුණි.
සාකච්ඡාව ආරම්භ කරමින් අමාත්ය සුනිල් කුමාර ගමගේ මහතා පෙන්වා දුන්නේ, ශ්රී ලංකාව සහ කියුබාව අතර පවතින්නේ සර්වකාලීන සමීප මිත්රත්වයක් බවයි. ව්යවස්ථාදායකයන් අතර ප්රජාතන්ත්රවාදී සහයෝගීතාවය වර්ධනය කරමින්, පාර්ලිමේන්තු රාජ්ය තාන්ත්රිකභාවය (Parliamentary Diplomacy) ඉහළ නැංවීමේ වැදගත්කම සහ ඒ වෙනුවෙන් මිත්රත්ව සංගමයේ ඉදිරි ක්රියාකාරකම් මෙහෙයවන ආකාරය අමාත්යවරයා මෙහිදී පැහැදිලි කළේය.
මෙහිදී අදහස් දැක්වූ කියුබානු තානාපතිනි පැට්රීෂියා ලාසාරා ගුවේරා මහත්මිය, ශ්රී ලංකාව වෙනුවෙන් සෞඛ්ය සේවා, ක්රීඩා, නවීන කෘෂිකර්මාන්තය සහ දේශගුණික විපර්යාසයන්ට මුහුණදීම ඇතුළු ප්රධාන ක්ෂේත්ර රැසක ද්විපාර්ශ්වික සහයෝගීතාවය තවදුරටත් පුළුල් කිරීමට කටයුතු කරන බව ප්රකාශ කළාය. එමෙන්ම දෙරටේ පාර්ලිමේන්තු මිත්රත්ව සංගම්වල සාමාජිකයින් අතර සමීප සබඳතා වර්ධනය කිරීමේ මූලික පියවරක් ලෙස නුදුරේදීම මාර්ගගත (Online) ක්රමය ඔස්සේ විශේෂ සාකච්ඡාවක් සංවිධානය කරන බවද ඇය පැවසුවාය.
ලෝක පූජිත කියුබානු විප්ලවවාදී නායක ෆිදෙල් කැස්ත්රෝ (Fidel Castro) මහතාගේ ජන්ම දින ශත සංවත්සරය (100th Birth Anniversary) සැමරීම වෙනුවෙන් ඉදිරියේදී සංවිධානය කරනු ලබන නිල අනුස්මරණ උත්සව සඳහා සහභාගී වන ලෙසද තානාපතිවරිය මෙහිදී ශ්රී ලංකා පාර්ලිමේන්තු මන්ත්රීවරුන් වෙත ගෞරවයෙන් ආරාධනා කර සිටියාය. කියුබාව දැනට මුහුණ දී සිටින ආර්ථික හා දේශපාලනික අභියෝග පිළිබඳවද ඇය මෙහිදී මිත්රත්ව සංගමයේ සාමාජිකයින් දැනුවත් කළ අතර, ජාත්යන්තර මට්ටමින් ශ්රී ලංකාවට කියුබාව වෙනුවෙන් සහයෝගය ලබා දිය හැකි ක්ෂේත්ර පිළිබඳවද දෙපාර්ශවය අතර මෙහිදී අදහස් හුවමාරු කරගැනීම සිදුවිය.
