ශ්රී ලංකාවේ සංචාරක ක්ෂේත්රයේ ප්රවර්ධනය ඉලක්ක කර ගනිමින් අද (25) දින සිට ක්රියාත්මක වන පරිදි ලෝකයේ ප්රධාන පෙළේ රටවල් 40ක පුරවැසියන් සඳහා දින 30ක කාලසීමාවකට වලංගු නොමිලේ සංචාරක වීසා (Free Tourist Visa/ETA) ලබා දීමට රජය තීරණය කර තිබේ. ආගමන විගමන දෙපාර්තමේන්තුව විසින් මේ පිළිබඳ විශේෂ නිල චක්රලේඛයක්ද මේ වන විට නිකුත් කර ඇත. මෙම නව ක්රමවේදය 2026 මාර්තු 30 වන දින කැබිනට් මණ්ඩලයේ අනුමැතිය සහ ඉන් අනතුරුව පාර්ලිමේන්තුවේ අනුමැතිය හිමිවීමෙන් පසු මෙලෙස අද සිට නිල වශයෙන් බලාත්මක කර තිබේ.
මෙම නොමිලේ සංචාරක වීසා පහසුකම හිමිවන රටවල් 40
ඕස්ට්රේලියාව, ඔස්ට්රියාව, බහරේන්, බෙලාරුස්, බෙල්ජියම, කැනඩාව, චීනය, චෙක් ජනරජය, ඩෙන්මාර්කය, ෆින්ලන්තය, ප්රංශය, ජර්මනිය, ඉන්දියාව, ඉන්දුනීසියාව, ඉරානය, ඊශ්රායලය, ඉතාලිය, ජපානය, කසකස්ථානය, කුවේටය, මලයාසියාව, නේපාලය, නෙදර්ලන්තය, නවසීලන්තය, නෝර්වේ, ඕමානය, පකිස්ථානය, පෝලන්තය, කටාර්, රුසියාව, සෞදි අරාබිය, දකුණු කොරියාව, ස්පාඤ්ඤය, ස්වීඩනය, ස්විට්සර්ලන්තය, තායිලන්තය, තුර්කිය, එක්සත් අරාබි එමීර් රාජ්යය (UAE), එක්සත් රාජධානිය (UK) සහ ඇමරිකා එක්සත් ජනපදය (USA).
ඉහත සඳහන් කළ රටවල රාජ්ය තාන්ත්රික (Diplomatic), නිල (Official), සේවා (Service) හෝ සාමාන්ය (Ordinary) ගමන් බලපත්ර (Passports) හිමි සියලුම පුරවැසියන් මෙම ක්රමය යටතේ නොමිලේ විද්යුත් සංචාරක අනුමැතිය (ETA) ලබා ගැනීමට සුදුසුකම් ලබයි. කෙසේ වෙතත්, මෙම රටවල් 40 හි පුරවැසියන් මෙන්ම ශ්රී ලංකාව සමඟ දැනටමත් ද්විපාර්ශ්වික අන්යෝන්ය ගිවිසුම් පවතින රටවල් වන මාලදිවයින, සීෂෙල්ස් සහ සිංගප්පූරුව යන රටවල පුරවැසියන්ද ඇතුළුව සියලුම විදේශිකයන් ශ්රී ලංකාවට පැමිණීමට පෙර අන්තර්ජාලය ඔස්සේ විද්යුත් සංචාරක අනුමැතිය (ETA) ලබා ගැනීම අනිවාර්ය වේ.
ද්විපාර්ශ්වික අන්යෝන්ය ගිවිසුම්වලට අනුව මාලදිවයින, සීෂෙල්ස් සහ සිංගප්පූරු පුරවැසියන් සඳහාද මෙම ETA අනුමැතිය නොමිලේ ක්රියාවට නැංවෙන අතර, විශේෂත්වයක් ලෙස මාලදිවයිනු පුරවැසියන් සඳහා දින 90 ක සංචාරක වීසා බලපත්රයක් හිමිවේ. මෙම නව සහනය ක්රියාත්මක වන අද (2026.05.25) දිනට පෙර කිසියම් අයදුම්කරුවෙකු විසින් ETA ගාස්තු ගෙවා ඇත්නම් එම ගාස්තු නැවත ගෙවනු නොලැබේ.
