ඉන්දියාවේ තමිල්නාඩු ප්රාන්තයේ කොයිම්බතූර්, සුලූර් (Sulur) ප්රදේශයේ පසුවූ දස හැවිරිදි කුඩා දැරියක පැහැරගෙන ගොස් අමානුෂික ලෙස ලිංගික අතවර කර ඝාතනය කිරීමේ ඛේදජනක සිදුවීම සම්බන්ධයෙන් මුළු මහත් තමිල්නාඩුව පුරාම මේ වන විට දැඩි මහජන කෝපයක් සහ විරෝධයක් හටගෙන තිබේ. මෙම සාහසික අපරාධය පිළිබඳව විමර්ශන සිදු කරන උසස් පොලිස් නිලධාරීන් පිරිසක්, ඒ සම්බන්ධයෙන් නිල මාධ්ය හමුවක් පැවැත්වීමට මොහොතකට පෙර එකිනෙකා සමඟ සිනාසෙමින් (කොක්හඬලා) විහිළු තහළු කරගන්නා ආකාරය දැක්වෙන වීඩියෝවක් සමාජ මාධ්ය වෙත මුදාහැරීමත් සමඟ මෙම තත්ත්වය තවදුරටත් උග්ර අතට හැරී ඇත.
අදාළ වීඩියෝ පටය ප්රසිද්ධ වීමත් සමඟම, මෙතරම් බරපතළ හා සංවේදී අපරාධයක් සම්බන්ධයෙන් කටයුතු කිරීමේදී පොලිස් නිලධාරීන් දැක්වූ මෙවැනි අසංවේදී සහ වගකීම් විරහිත හැසිරීම් රටාව පිළිබඳව දේශපාලන ක්රියාකාරීන්, මානව හිමිකම් සංවිධාන මෙන්ම සමස්ත මහජනතාව ද සිය දැඩි පිළිකුල සහ විවේචනය පළ කර සිටිති. සිදුවීම පිළිබඳව තමිල්නාඩු ප්රාන්ත රජයේ සහ ඉහළ පොලිස් බලධාරීන්ගේ දැඩි අවධානය යොමුව ඇති අතර, මියගිය දැරියට සහ ඇයගේ පවුලේ ඥාතීන්ට අගෞරවයක් වන අයුරින් හැසිරුණු සහ රාජකාරි ගෞරවය කෙලෙසූ එම වීඩියෝවේ සිටින සියලුම ජ්යෙෂ්ඨ පොලිස් නිලධාරීන්ගේ වැඩ තහනම් කිරීමට (Suspended) වහාම පියවර ගන්නා ලෙස ප්රාන්ත බලධාරීන් විසින් නියෝග කර තිබේ.
