විපක්ෂයට සහ රට විනාශ කිරීමට බලා සිටින සතුරු බලවේගවලට ජනතා බලය ප්රදර්ශනය කරන සාර්ථක මැයි දිනයක් පවත්වන බව ජනතා විමුක්ති පෙරමුණේ ප්රධාන ලේකම් ටිල්වින් සිල්වා මහතා පවසයි. ඊයේ පැලවත්ත පක්ෂ මූලස්ථානයේ පැවැති මාධ්ය හමුවකදී ඒ මහතා පෙන්වා දුන්නේ මෙරට ඉතිහාසයේ දේශපාලන ව්යාපාරයක් විසින් එකම දිනයකදී දිස්ත්රික්ක 21ක් පුරා දැවැන්ත මැයි රැලි 21ක් පවත්වන පළමු අවස්ථාව මෙය ලෙස වාර්තාගත වන බවයි. ‘ජන රජයට ජන බලයක්’ යන තේමාව යටතේ මෙවර මැයි දිනය සැමරෙන අතර මැදපෙරදිග පවතින යුදමය තත්ත්වය හමුවේ ඉන්ධන අරපිරිමැස්මෙන් කටයුතු කිරීමේ අවශ්යතාව සලකා මෙලෙස දිස්ත්රික් මට්ටමින් රැලි විමධ්යගත කිරීමට පියවර ගෙන ඇත.
ජනාධිපති අනුර කුමාර දිසානායක මහතා නුවරඑළිය සහ මහරගම මැයි රැලි සඳහා සහභාගි වීමට නියමිත අතර ජාතික ජන බලවේගයේ අනෙකුත් නායකයන් දිස්ත්රික් මට්ටමේ රැලිවලට නායකත්වය ලබා දෙයි. මාලිමාවේ රජය යටතේ වැඩකරන ජනතාවගේ මූලික වැටුප වැඩි කිරීම, වතු කම්කරු වැටුප් ඉහළ නැංවීම සහ අනියම් සේවකයන් ස්ථිර කිරීමට කැබිනට් අනුමැතිය ලබා ගැනීම වැනි සහන රැසක් දැනටමත් ලබා දී ඇති බව ටිල්වින් සිල්වා මහතා මෙහිදී සිහිපත් කළේය. මේ අතර ජාතික ජන බලවේගයේ ප්රධාන ලේකම් වෛද්ය නිහාල් අබේසිංහ මහතා සඳහන් කළේ මෑතකාලීන ආර්ථික ජයග්රහණයක් ලෙස මෙරට ඒක පුද්ගල ආදායම ඩොලර් 5000 සීමාව ඉක්මවා ගොස් ඇති බවයි.
ළමා හා කාන්තා කටයුතු අමාත්ය සරෝජා සාවිත්රි පෝල්රාජ් මහත්මිය ද මෙම අවස්ථාවට එක්වෙමින් ජාතික සමගිය සහ ආර්ථිකය ගොඩනැඟීමට රජය දක්වන දායකත්වය අගය කරමින් සියලුම ජන කොටස්වල කාන්තාවන්ට මෙම මැයි රැලි සමඟ එක්වන ලෙස ආරාධනා කළාය. බංකොලොත් කර තිබූ රටක් භාරගෙන ආර්ථිකය ස්ථාවර කරමින් ලෝකය ඉදිරියේ ගෞරවනීය රාජ්යයක් ලෙස ලංකාව ගොඩනඟන මෙම ගමනට ශක්තියක් වීම සඳහා ප්රගතිශීලී සියලු ජනතාවට මෙවර මැයි රැලිය විවෘත වේ.
