දේශීය කිරි කර්මාන්තය ඉහළ නැංවීම සහ දේශීය ආර්ථිකය ශක්තිමත් කිරීම වෙනුවෙන් නුවරඑළිය දිස්ත්රික්කයේ කිරි ගොවීන් දිනකට කිරි ලීටර් ලක්ෂ 2ක් ලබාදීමට කටයුතු කරන බව නුවරඑළිය දිස්ත්රික් පාර්ලිමේන්තු මන්ත්රී සහ දිස්ත්රික් සම්බන්ධීකරණ කමිටුවේ සභාපති මංජුල සුරවීරආරච්චි මහතා පවසයි. බගවන්තලාව ප්රදේශයේ කිරි ගොවීන්ගේ ගැටලු සම්බන්ධයෙන් සාකච්ඡා කිරීම සඳහා මිල්කෝ (Milco) ආයතනය විසින් සංවිධානය කර තිබූ විශේෂ හමුවකට එක්වෙමින් ඔහු මේ බව කියා සිටියේය.
එහිදී වැඩිදුරටත් අදහස් දැක්වූ මන්ත්රීවරයා කියා සිටියේ, ආනයනික කිරිපිටි සඳහා මෙරටින් විදේශ රටවලට විශාල ඩොලර් ප්රමාණයක් ඇදී යන බවත්, එය අවම කිරීම සඳහා වත්මන් රජය ගෙන යන වැඩපිළිවෙළට නුවරඑළියේ කිරි ගොවීන්ගෙන් විශාල දායකත්වයක් ලැබෙන බවත්ය. පවතින අවම පහසුකම් යටතේ වුවද කිරි ගොවියාගේ නිෂ්පාදන ධාරිතාව තවදුරටත් ඉහළ නැංවීම කෙරෙහි මිල්කෝ ආයතනයේ සෘජු අවධානය යොමුව ඇති බව ද ඔහු පැවසීය. පසුගිය රජයන් විසින් මිල්කෝ ආයතනය ඉන්දියාවේ අදානි (Adani) සමාගමට විකිණීමට සැලසුම් කර තිබූ බවත්, වත්මන් රජය මැදිහත් වී එය වළක්වා ගනිමින් මේ වන විට මිල්කෝ ආයතනය ලාභ ලබන රාජ්ය ආයතනයක් බවට පත්කර ඇති බවත් ඔහු මෙහිදී අවධාරණය කළේය.
මෙම සාකච්ඡාව සඳහා මිල්කෝ සමාගමේ නියෝජ්ය සභාපති වෛද්ය ගමගේ, කිරි සැපයුම් සහ සංවර්ධන කළමනාකාර අඹේකෝන්, පළාත් කළමනාකාර හපුහින්න සහ සහකාර පළාත් කළමනාකාර දසනායක යන මහත්වරුන් ඇතුළු නිලධාරීන් පිරිසක් ද එක්ව සිටියහ.
