ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්යාංශය සහ එක්සත් ජාතීන්ගේ ලෝක ආහාර වැඩසටහන (WFP) ඒකාබද්ධව ක්රියාත්මක කරනු ලබන ගෙවතු වගා පාසල් පෝෂණ වැඩසටහන යටතේ නුවරඑළිය දිස්ත්රික්කයේ තෝරාගත් ප්රතිලාභීන් වෙත කෘෂිකාර්මික උපකරණ භාරදීමේ උත්සවය අමාත්ය ආචාර්ය උපාලි පන්නිල මහතාගේ ප්රධානත්වයෙන් නුවරඑළිය දිස්ත්රික් ලේකම් කාර්යාලයේදී පැවැත්විණි.
පාසල් දරුවන්ගේ පෝෂණ අවශ්යතා සපුරාලීමටත්, ගොවි ජනතාවගේ කෘෂිකාර්මික කටයුතු කාර්යක්ෂම කිරීමටත් අපේක්ෂා කරන මෙම වැඩසටහන හරහා දේශීය ආහාර නිෂ්පාදනය ඉහළ නැංවීමට සහ ජීවනෝපාය හා ළමා පෝෂණය අතර සබඳතාව ශක්තිමත් කිරීමට අපේක්ෂා කෙරේ. ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීමේ අමාත්යාංශය යටතේ ක්රියාත්මක වන ලෝක ආහාර වැඩසටහනේ සහයෝගීතාව සඳහා වූ හවුල්කාරිත්ව ලේකම් කාර්යාලය (PSWFPC) මඟින් මෙම සමස්ත ක්රියාවලිය සම්බන්ධීකරණය කරනු ලබයි.
උත්සව සභාව ඇමතූ අමාත්ය ආචාර්ය උපාලි පන්නිල මහතා සඳහන් කළේ, ලෝක ආහාර වැඩසටහන (WFP) යනු 1968 වසරේ සිට ශ්රී ලංකාවේ පෝෂණ කටයුතු නංවාලීමට සහ රටේ සංවර්ධනය වෙනුවෙන් සැලකිය යුතු දායකත්වයක් ලබා දුන් ආයතනයක් බවත්, ශ්රී ලංකාවේ ක්රියාත්මක වන පාසල් පෝෂණ වැඩසටහන සඳහා ද එය සුවිශේෂී දායකත්වයක් සපයන බවත්ය. මෙම වැඩසටහන යටතේ මේ වන විට මෙරට පාසල් 2,013ක සිසුන් තුන් ලක්ෂයකට අධික පිරිසකට පෝෂ්යදායී ආහාර වේලක් ලබා දීමට සහාය හිමි වන බව අවධාරණය කළ අමාත්යවරයා, නුවරඑළිය දිස්ත්රික්කයේ පාසල් 400ක මෙම වැඩසටහන ක්රියාත්මක කරමින් පාසල් දරුවන්ගේ මන්දපෝෂණය දුරු කිරීම අරමුණු කර ඇති බවද ප්රකාශ කළේය.
මෙම අවස්ථාවට අධ්යාපන හා උසස් අධ්යාපන නියෝජ්ය අමාත්ය මධුර සෙනෙවිරත්න මහතා, නුවරඑළිය දිස්ත්රික් සම්බන්ධීකරණ කමිටුවේ සභාපති, පාර්ලිමේන්තු මන්ත්රී මංජුල සුරවීර ආරච්චි මහතා, ලෝක ආහාර වැඩසටහනේ මෙරට නියෝජිත සහ මෙරට අධ්යක්ෂ පිලිප් වෝඩ් මහතා, සමාජ ආරක්ෂණ හා ප්රජා සවිබලගැන්වීම් අමාත්යාංශයේ ලේකම් සම්පත් මන්ත්රිනායක මහතා, නුවරඑළිය දිස්ත්රික් ලේකම් තුෂාරි තෙන්නකෝන් මහත්මිය ඇතුළු රාජ්ය නිලධාරීන් සහ ප්රතිලාභීන් පිරිසක් එක්ව සිටියහ.
