ප්රධාන දුම්රිය මාර්ගයේ වලකුඹුර සහ පොල්ගහවෙල දුම්රිය ස්ථාන අතරදී අංක 4458 දරන තෙල් ප්රවාහන දුම්රිය පීලි පැනීමකට ලක්වීම හේතුවෙන් එම මාර්ගයේ දුම්රිය ධාවනයට දැඩි බාධා එල්ල වී තිබේ. ඊයේ (08) සිදුවූ මෙම අනතුරත් සමඟ ප්රධාන මාර්ගයේ දුම්රිය ගමනාගමනය තාවකාලිකව අවහිර වී ඇති බව දුම්රිය දෙපාර්තමේන්තුව නිල වශයෙන් නිවේදනය කළේය.
දුම්රිය දෙපාර්තමේන්තුව පවසන පරිදි, මෙම පීලි පැනීම හේතුවෙන් දුම්රිය මාර්ගයට ද සැලකිය යුතු හානි සිදුව ඇත. මේ හේතුවෙන් පොල්ගහවෙල හරහා ධාවනය වීමට නියමිතව තිබූ අනෙකුත් සියලුම දුම්රියයන් සැලකිය යුතු වේලාවක් ප්රමාද වී ධාවනය වන අතර, කාර්යාල දුම්රිය ඇතුළු මගී ප්රවාහන සේවාවලට ඉන් දැඩි බලපෑමක් එල්ල වී තිබේ.
මාර්ගය යථා තත්ත්වයට පත් කිරීම සඳහා දුම්රිය ඉංජිනේරු කණ්ඩායම් මේ වන විටත් මෙහෙයුම් ආරම්භ කර ඇති අතර, පීලි පැනීමට ලක්වූ තෙල් ප්රවාහන දුම්රිය ඉවත් කිරීමේ කටයුතු කඩිනම් කර ඇත. ප්රධාන මාර්ගයේ ගමන් කිරීමට බලාපොරොත්තුවෙන් සිටින මගීන්ට විකල්ප ප්රවාහන මාර්ග භාවිත කරන ලෙස හෝ පවතින ප්රමාදයන් පිළිබඳව අවධානයෙන් පසුවන ලෙස බලධාරීහු දැනුම් දෙති.
