සර් ජෝන් කොතලාවල විද්යාලයේ ගුරුවරයෙකුගේ මෝටර් රථයක් ගිනි ගැනීමට හේතු වූ ගිනිපෙට්ටියක් දැල්වූ බවට ළුහුඬු දරුවෙකු පිළිගත් නමුත්, ඔහු වයස අවුරුදු 8ක් පමණ වන කුඩා දරුවෙකු වන බැවින් පාසල් පරිපාලනය හෝ ශ්රී ලංකා පොලිසිය විසින් ඔහුට එරෙහිව කිසිදු චෝදනාවක් හෝ නඩු පැවරීමක් සිදු කර නොමැති බවත්, අනාගතයේදීත් එසේ නොකරන බවත් එම විද්යාලයේ පැරණි ශිෂ්ය සංගමය නිවේදනය කරයි.පසුගිය ජූලි 3 වන දින පස්වරු 2.55ට පමණ පාසල් පරිශ්රය තුළදී ගුරුවරයාගේ මෝටර් රථය ගින්නට ලක් වූ අතර, පසුව සීසීටීවී (CCTV) දර්ශන මඟින් අනාවරණය වූයේ කුඩා දරුවෙකු වාහනය අසල ගැවසී ගිනිපෙට්ටියක් ඉවත දමන ආකාරයයි. රක්ෂණ කටයුතු සඳහා පමණක් ගුරුවරයා කුරුණෑගල මූලස්ථාන පොලිසියට පැමිණිල්ලක් ඉදිරිපත් කළ අතර, එහිදී ඔහු දරුවාගේ නම සඳහන් කර නොතිබිණි.පාසලට අගෞරව වන අයුරින් සමාජ මාධ්යවල සංසරණය වන විකෘති කරන ලද වීඩියෝ සහ වාර්තා හෙළා දකින බව පෙන්වා දෙන පැරණි ශිෂ්ය සංගමය, දරුවා කිසිදු පීඩාවකින් තොරව අඛණ්ඩව පාසලට පැමිණෙන බවත්, ඔහුගේ ආරක්ෂාව සහ අයිතිවාසිකම් සුරක්ෂිත කර ඇති බවත් අවධාරණය කරයි. එසේම, පාසල් වේලාව අවසන් වී පැය තුනකට අධික කාලයක් කුඩා දරුවෙකු භාරකරුවෙකු නොමැතිව පාසලේ රැඳී සිටීමට ඉඩ හැරීම දෙමාපියන්ගේ බරපතල වරදක් බවද සංගමය පෙන්වා දී තිබේ.
