මගී සේවා අවසර පත්ර 308කට සිදු වූ දෙයක් පිළිබඳව කිසිදු වාර්තාවක් නොමැති බවත් එම බලපත්ර පද්ධතියෙන් අතුරුදන් වී ඇති බවත් ප්රවාහන හා මහාමාර්ග නියෝජ්ය අමාත්ය වෛද්ය ප්රසන්න ගුණසේන මහතා පාර්ලිමේන්තුවේදී අනාවරණය කළේය. දැනට නිකුත් කර ඇති බලපත්ර 2,493ක් අතුරින් 49ක් අවලංගු වී ඇති අතර තවත් බලපත්ර 357ක් නිකුත් කර තිබුණ ද ඒවායේ බස් රථ ධාවනය නොවන බව නිරීක්ෂණය වී තිබේ. මෙම ධාවනය නොවන බස් රථ සඳහා ජූනි 30 වන දා දක්වා කාලය ලබා දී ඇති අතර ඉන් පසුව එම බලපත්ර සියල්ල ටෙන්ඩර් මඟින් අලුතින් නිකුත් කිරීමට රජය තීරණය කර ඇත.
බස් බලපත්ර පැවරීමේදී මෙතෙක් පැවති බාධා ඉවත් කරමින් ඒවා නීත්යනුකූලව වෙනත් පාර්ශ්වයකට පැවරීමට අවසර දෙන බව ද නියෝජ්ය අමාත්යවරයා මෙහිදී ප්රකාශ කළේය. මීට පෙර බොහෝ පිරිස් ඇටෝනි බලපත්ර මඟින් අවිධිමත් ලෙස බලපත්ර පවරාගෙන තිබූ අතර ගමනාගමන සංශෝධන පනත මඟින් එම ගැටලු නිරාකරණය කිරීමට අවශ්ය ප්රතිපාදන සලසා තිබේ. මින් ඉදිරියට දේශපාලනඥයන් පසුපස යෑමෙන් තොරව විනිවිදභාවයකින් යුත් ක්රමවේදයක් යටතේ ඕනෑම අයකුට බස් බලපත්ර ලබා ගැනීමට අවස්ථාව හිමි වේ.
බලපත්රයක් පැවරීමේදී නව නිර්ණායක කිහිපයක් හඳුන්වා දී ඇති අතර බලපත්රය ලබා ගන්නා පුද්ගලයාගේ බැංකු ගිණුමක අවම වශයෙන් මාස හයක කාලයක් රුපියල් මිලියන දෙකක මුදලක් තිබීම අනිවාර්ය කර ඇත. හදිසි අනතුරකදී හෝ අලුත්වැඩියාවකදී මූල්ය හැකියාව තහවුරු කර ගැනීම සඳහා මෙම පියවර ගෙන තිබේ. මීට අමතරව අදාළ බස් රථය මීට පෙර ධාවනය කළ ආකාරය සහ ඒ සම්බන්ධයෙන් මහජන පැමිණිලි තිබේ ද යන්න පිළිබඳව ද දැඩි ලෙස සොයා බලන බව අමාත්යවරයා වැඩිදුරටත් අවධාරණය කළේය.
