ජාතික නිවාස සංවර්ධන අධිකාරිය මගින් මෙහෙයවනු ලබන වත්මන් රජයේ ප්රමුඛතම වැඩසටහනක් වන “තමන්ගේම තැනක් – ලස්සන ජීවිතයක්” නිවාස ආධාර වැඩසටහන දිවයින පුරා ක්රියාත්මක කිරීම ආරම්භ කර තිබේ. ඉඩම් හිමිකම් තිබුණද පැල්පත් හා තාවකාලික නිවාසවල ජීවත් වන, කුඩා දරුවන් හෝ ආබාධිත සාමාජිකයින් සිටින අඩු ආදායම්ලාභී පවුල් වෙනුවෙන් මෙම ව්යාපෘතිය ක්රියාත්මක වේ.
වර්ග අඩි 550කින් යුත්, සාලය, නිදන කාමර දෙකක්, මුළුතැන්ගෙය සහ නාන කාමරයකින් සමන්විත මෙම නිවසක මුළු වටිනාකම රුපියල් ලක්ෂ 20කි. ඒ සඳහා රජයෙන් රුපියල් ලක්ෂ 10ක මූල්යාධාර සහ තාක්ෂණික සහය නොමිලේ ලබා දෙන අතර, ඉතිරි ලක්ෂ 10 ද්රව්ය හා ශ්රම දායකත්වය ලෙස ප්රතිලාභියාගෙන් අපේක්ෂා කෙරේ. 2026 වසර සඳහා ජාතික ඉලක්කය නිවාස 9,418ක් වන අතර, එහි එක් පියවරක් ලෙස බදුල්ල දිස්ත්රික්කයේ තෝරාගත් ප්රතිලාභී පවුල් 150ක් සඳහා රුපියල් ලක්ෂ 10 බැගින් වූ (මුළු ආයෝජනය රුපියල් මිලියන 150ක්) හිමිකම් චෙක්පත් ප්රදානය කිරීම අද දින ඌව පළාත් ශ්රවණාගාරයේදී සිදු කෙරිණි.
