ඇමරිකාවේ ඇලබාමා ප්රාන්තයේ කෝල්ඩ් ස්ප්රින්ග්ස් (Cold Springs) උසස් පාසලේ හිටපු දැරියන්ගේ පැසැන්දු පුහුණුකාරිනියක වූ 35 හැවිරිදි පේජ් ඇඩම්ස් (Paige Adams), සිසුවියක සමඟ ලිංගික සබඳතා පැවැත්වීම ඇතුළු ලිංගික අපරාධ චෝදනා 32ක් සම්බන්ධයෙන් අත්අඩංගුවට ගෙන තිබේ. වරක් තරුණ පරපුරට විශිෂ්ට ආදර්ශමත් චරිතයක් ලෙස ඇගයීමට ලක්ව සිටි ඇය, පසුගිය අඟහරුවාදා (අප්රේල් 21) මෙලෙස අත්අඩංගුවට පත්වූයේ ජූරි සභාවක් මගින් ඇයට එරෙහිව අධිචෝදනා ගොනු කිරීමෙන් පසුවය.
ඇයට එරෙහිව එල්ල වී ඇති චෝදනා අතර සිසුවියකට අසභ්ය ද්රව්ය බෙදා හැරීම සහ වයස අවුරුදු 19ට අඩු සිසුවියක සමඟ ලිංගික සබඳතා පැවැත්වීම ප්රධාන වේ. මෙම සිද්ධිය හෙළිදරව් වීමත් සමඟ ඇය පාසල් සේවයෙන් ඉල්ලා අස්වූ අතර, ඇයගේ ස්වාමිපුරුෂයා වන ඩ්රෲ ඇඩම්ස් (Drew Adams) ද ඇගෙන් දික්කසාද වීමට අධිකරණය හමුවේ නඩු පවරා තිබේ.
කෝල්ඩ් ස්ප්රින්ග්ස් පාසලේ පිරිමි පැසැන්දු කණ්ඩායමේ පුහුණුකරු ලෙස කටයුතු කරන්නේ ද ඇයගේ ස්වාමිපුරුෂයාය. පේජ් ඇඩම්ස් සිය පුහුණුකාරිත්වය යටතේ කණ්ඩායම ජයග්රහණ රැසක් කරා මෙහෙයවා තිබුණ ද, මෙම බරපතළ චෝදනා හමුවේ ඇයගේ වෘත්තීය ජීවිතය මෙන්ම පෞද්ගලික ජීවිතය ද දැඩි අර්බුදයකට ලක්ව ඇති බව විදෙස් මාධ්ය වාර්තා කරයි.
