පකිස්තානය සහ ඇෆ්ගනිස්තානය අතර දේශසීමා කලාපයේ මාස කිහිපයක් තිස්සේ පැවැති සාමකාමී වාතාවරණය මුළුමනින්ම බිඳදමමින්, පකිස්තාන ගුවන් හමුදාව විසින් ඇෆ්ගනිස්තාන දේශසීමා ඉලක්ක වෙත දරුණු ගුවන් ප්රහාර මාලාවක් එල්ල කර තිබේ.
පකිස්තාන ජනමාධ්ය අමාත්ය අතාවුල්ලා තාරාර් මහතා ප්රකාශ කර ඇත්තේ, තමන් එල්ල කරන ලද “නිරවද්ය ප්රහාර” (Precision strikes) මඟින් එරට ක්රියාත්මක ත්රස්තවාදී ඉලක්ක 4ක් මුළුමනින්ම විනාශ කර සටන්කාමීන් 26 දෙනෙකු ජීවිතක්ෂයට පත් කිරීමට සමත් වූ බවයි. කෙසේ වෙතත්, ඇෆ්ගනිස්තානයේ බලයේ සිටින තාලිබාන් රජය මෙම ප්රකාශය ප්රතික්ෂේප කරමින් කියා සිටින්නේ, පකිස්තානයේ මෙම ගුවන් ප්රහාර හේතුවෙන් අහිංසක ළමුන් 11 දෙනෙකු ඇතුළු සිවිල් වැසියන් 13 දෙනෙකු ජීවිතක්ෂයට පත්ව ඇති බවය.
පකිස්තාන භූමිය තුළ විවිධ ප්රහාර එල්ල කරනු ලබන ත්රස්තවාදී කණ්ඩායම්වලට ඇෆ්ගනිස්තානය විසින් දිගින් දිගටම රැකවරණය සපයන බවට පකිස්තාන රජය චෝදනා කරයි. එම චෝදනා තරයේ ප්රතික්ෂේප කරන තාලිබාන් රජය අවධාරණය කරන්නේ, තම භූමිය වෙනත් කිසිදු රටක ජාතික ආරක්ෂාවට තර්ජනයක් වන පරිදි භාවිතා කිරීමට කිසිසේත්ම ඉඩ නොදෙන බවයි. පසුගිය ඔක්තෝබර් මාසයේදී දෙරට අතර සටන්විරාමයකට (Ceasefire) එළඹුණද, පසුව පෙබරවාරි මාසයේදී සිදු වූ දරුණු ගැටුම්වලින් පුද්ගලයන් සිය ගණනක් මියගියහ. ඉන් අනතුරුව දෙරට අතර එල්ල වූ බරපතළම සහ මාරාන්තිකම ප්රහාරය මෙය ලෙස වාර්තා වේ.
