පාකිස්ථානය සහ සෞදි අරාබිය අතර පවතින රහසිගත ආරක්ෂක ගිවිසුමක (SMDA) තොරතුරු ‘Drop Site News’ වෙබ් අඩවිය විසින් අනාවරණය කර ඇති අතර, එමගින් මැදපෙරදිග කලාපීය යුද්ධයට පාකිස්ථානය සෘජුවම සම්බන්ධ වීමේ දැඩි අවදානමක් පවතින බව හෙළි වී තිබේ. අමරිකාව සහ ඉරානය අතර සාම සාකච්ඡා සඳහා පාකිස්ථානය මැදිහත්කරුවෙකු ලෙස කටයුතු කරමින් සිටියදී, සෞදි අරාබිය විසින් පාකිස්ථාන හමුදා එරටට පැමිණි බව නිල වශයෙන් ප්රකාශ කිරීම හරහා පාකිස්ථානයේ අපක්ෂපාතී භාවය දැඩි ප්රශ්න කිරීමකට ලක්ව ඇත.
අනාවරණය වූ ලේඛනවලට අනුව, 2025 වසරේදී අත්සන් කරන ලද මෙම නවතම ආරක්ෂක ගිවිසුම මගින් සෞදි අරාබියට එල්ල වන ඕනෑම ආරක්ෂක තර්ජනයකදී සිය හමුදා යොදවා සහය වීමට පාකිස්ථානය බැඳී සිටියි. කෙසේ වෙතත්, මෙම ගිවිසුම පාකිස්ථාන පාර්ලිමේන්තුවේ අනුමැතියකින් තොරව හමුදා ප්රධානීන් සහ රජයේ ඉහළ පෙළේ නිලධාරීන් අතර රහසිගතව ක්රියාත්මක වී ඇති බව සඳහන් වේ. විශේෂයෙන්ම ආර්ථික අර්බුදයක පසුවන පාකිස්ථානයට සෞදි අරාබියෙන් ලැබෙන මූල්ය ආධාර හමුවේ මෙම ගිවිසුම ක්රියාත්මක කිරීමට සිදුව තිබීම කැපී පෙනෙන කරුණකි.
මෙම තත්ත්වය පාකිස්ථානයට උපායමාර්ගික වශයෙන් දැඩි අර්බුදයක් නිර්මාණය කර ඇත්තේ ඉරානය සමඟ පවතින සමීප සබඳතා සහ එරට අභ්යන්තරයේ වෙසෙන විශාල ෂියා මුස්ලිම් ජනගහනය හේතුවෙනි. යුද්ධයට මැදිහත් වුවහොත් රට තුළ අභ්යන්තර ගැටුම් ඇතිවීමේ අවදානම මෙන්ම අසල්වැසි ඉරානය සමඟ සබඳතා බිඳ වැටීම පාකිස්ථානයට දරුණු බලපෑමක් එල්ල කරනු ඇත. මේ හේතුව නිසාම පාකිස්ථාන නායකත්වය කෙසේ හෝ යුද්ධය නතර කර සාමය ඇති කිරීමට දැඩි උත්සාහයක නිරත වන බව විදේශ දේශපාලන විශ්ලේෂකයෝ පවසති.
