පාකිස්තානයේ ජනප්රිය යොවුන් ටික්ටොක් (TikTok) තරුවක් වූ 17 හැවිරිදි සනා යූසුෆ් (Sana Yousaf) නමැති තරුණිය ඝාතනය කිරීමේ සිද්ධියට වරදකරු වූ 23 හැවිරිදි උමර් හයාත් (Umar Hayat) නමැත්තාට ඉස්ලාමාබාද් අධිකරණයක් විසින් මරණ දණ්ඩනය නියම කර තිබේ.
පසුගිය වසරේ ජූනි මාසයේදී සනාගේ උපන්දිනය දින ඇගේ නිවසට බලහත්කාරයෙන් ඇතුළු වූ සැකකරු, තමන් සමඟ ප්රේම සම්බන්ධතාවක් ආරම්භ කරන ලෙස කළ බලපෑම ඇය ප්රතික්ෂේප කිරීම හේතුවෙන් ඇතිවූ බහින්බස්වීමක් දුරදිග යාමෙන් ඇයට වෙඩි තබා ඝාතනය කර තිබුණි. පසුගිය ජූලි මාසයේදී සැකකරු අධිකරණය හමුවේ මෙම අපරාධය පාපොච්චාරණය කර තිබූ අතර, පාකිස්තාන පොලීසිය CCTV කැමරා 113ක දර්ශන ඇතුළු තාක්ෂණික සාක්ෂි රැසක් උපයෝගී කරගනිමින් විමර්ශන පවත්වා තිබුණි. ඒ අනුව වරදකරුට මරණ දණ්ඩනය නියම කළ අධිකරණය, වින්දිත තරුණියගේ පවුලට ඇමරිකානු ඩොලර් 9,000කට ආසන්න වන්දියක් ගෙවන ලෙස ද නියෝග කර ඇත.
මෙම තීන්දුව පිළිබඳව අදහස් දක්වමින් සනාගේ පියා වන සයිඩ් යූසුෆ් හසන් ප්රකාශ කළේ මෙය සමාජයේ මෙවැනි අපරාධවලට පෙළඹෙන පුද්ගලයින්ට කදිම පාඩමක් වන බවයි. මිලියනයකට අධික අනුගාමිකයින් සිටි සනාගේ මෙම ඝාතනයත් සමඟ පාකිස්තානය පුරා දැඩි විරෝධතා රැල්ලක් මතු වූ අතර, අන්තර්ජාලය තුළ කාන්තා නිර්මාණකරුවන් සඳහා පවතින තර්ජනාත්මක වාතාවරණය මෙමඟින් යළිත් තහවුරු වන බව එරට ඩිජිටල් අයිතිවාසිකම් සංවිධාන පෙන්වා දෙයි.
