පේරාදෙණිය කෘෂි පීඨයේ පිළිතුරුපත් ගිනි තැබීම ඔප්පු වී තිබියදී.

අනාගත පරපුරට වැරදි ආදර්ශයක් විය හැකි සිදුවීම යටගැසූ පුද්ගයන්ටද දඩුවම් දෙනු

පේරාදෙණිය විශ්වවිද්‍යාලයේ ආහාර විද්‍යා හා තාක්‍ෂණික දෙපාර්තමේන්තුවේ (Department of Food Science and Technology) කථිකාචාර්ය එන්.වයි.ජයනාත් යන අය විසින් සිදුකර තිබෙන විෂමාචාරයන්ට එරෙහිව විශ‍්‍රාමික මහාධිකරණ විනිසුරු ලලිත් ඒකනායක මහතා විසින් සිදුකරන ලද පරීක්‍ෂණයේදී ජයනාත් නැමැති අය සිදුකරන ලද සදාචාරවත් නොවන ක‍්‍රියාවන් රාශියක් එලිදරව් වී තිබේ.

ජයනාත් නැමැත්තා විසින් පිළිතුරුපත් සලකුණු කිරීම සදහා ඔහු සමග සමිප සම්බන්ධතාවයක් පවත්වන ලද උල්පත්කුඹුර නැමැති ශිෂ්‍යාවට අමතරව තරිදු ලක්‍ෂාන් නැමැති තවත් ශිෂ්‍යයෙකුද නීති විරෝධී ලෙසට යොදවාගෙන තිබෙන බව අදාල පරීක්‍ෂණයේදී හෙලිදරව්ව ඇති අතර තරිදු ලක්‍ෂාන් නැමැති අය ලලිත් ඒකනායක මහතා ඉදිරිපිටදී ලබාදුන් සිය සාක්‍ෂියේදී ඒ බව පිළිගෙන තිබේ.ලලිත් ඒකනායක වාර්ථාවේ 36 වන පිටුවේ එකී පිලිගැනීම සටහන්ව ඇත.අවශ්‍ය කෙනෙකුට එය කියවා ගැනීමට හැකිය.

එහිදී හෙලිදරව් වී ඇති පරිදි සනාථන සභාවේ අනුමැතියකින් තොරව වෙනත් කථිකාචාර්යවරයෙකුට පවා පිළිතුරුපත් සලකුණු කිරීම සදහා සහභාගීවීමට නොහැකි තත්ත්වයක් තුල තරිදු ලක්‍ෂාන් නැමැති අය එකී කාර්යයට යොදවා ගැනීම සම්පූර්ණයෙන්ම නීත්‍යාණුකූල නොවන සහ සදාචාරවත් නොවන ක‍්‍රියාවක් බව පැහැදිලිව පෙනී යයි.

ගරු කටයුතු විශ‍්‍රාමික මහාධිකරණ විනිසුරුවරයා සිය වාර්ථාවේ අවසාන ඡේදය මගින් දක්වා තිබෙන නිර්දේශය පේරාදෙණිය විශ්වවිද්‍යාලයේ බලධාරීන් මතු නොව මෙරට සියළු පුරවැසියන් සිහිබුද්ධියෙන් විමසා බැලිය යුතු කරුණුවලින් යුක්තය.එබැවින් එය මෙහිදී සම්පූර්ණයෙන්ම උපුටා දැක්වීම අත්‍යවශ්‍යව තිබේ.එය මෙසේය.

(උපුටා ගැනීම)

”ඒ අනුව චූදිත නිලධාරී එන්.වයි.ජයනාත් මහතා කෘෂිකර්ම පීඨයේ ආහාර විද්‍යා හා තාක්‍ෂණ දෙපාර්තමේන්තුවේ කථිකාචාර්ය (දැනට වැඩ තහනමට ලක්ව ඇති ) ට එරෙහිව ඉදිරිපත් කර තිබූ චෝදනා අතරින් 3 වන චෝදනාවට පමණක් ඔහු නිවැරදි කරු වන අතර 1,2,4,5,6,7,8,9,10,11 යන චෝදනා සදහා චූදිත වරදකරු වන බැවින්ද චූදිත නිලධාරී විසින් කර ඇති විෂමාචාරයන් දෙස බැලීමේදී වසර 9 ක පළපුරුදු විශ්වවිද්‍යාල කථිකාචාර්යවරයෙකු ලෙස වගකිවයුතු නිලධාරියෙක් වශයෙන් කිසිසේත් සමාජය අනුමත නොකරන ඔහුගේ චාරානුකූලභාවයක් නොමැති ක‍්‍රියා පිළිවෙල හේතුකොටගෙන සමස්ථ විශ්වවිද්‍යාල පද්ධතියම අපහසුතාවයට හා අපකීර්තියට පත් කරමින් අනාගත ගුරු ශිෂ්‍ය පරපුරට අනාදර්ශයක් දෙමින් සිදුකර ඇති හා සනාථ වී ඇති විෂමාචාරයන් සුළු කොට තැකිය නොහැකි බවත් නිසි දඩුවම් ලබා නොදෙන්නේ නම් එය අනාගත පරපුරටම වැරදි ආදර්ශයක් විය හැකි බවත් සලකා ඉහත කී චූදිත නිලධාරිට විශ්වවිද්‍යාල ආයතන සංග‍්‍රහයේ අදාල වගන්ති කඩ කිරීම පිළිබදව දැඩි ලෙස කටයුතු කල යුතු වන බවට සියළු කරුණු සලකා නිර්දේශ කරමි.*

(උපුටා ගැනීම අවසන්)

පරීක්‍ෂණය සිදුකල විශ‍්‍රාමික මහාධිකරණ විනිසුරු ලලිත් ඒකනායක මහතා මෙතරම් අවධාරණාත්මක සහ දැඩි නිර්දේශයක් ලබාදී තිබියදීත් එවකට සිටි පාලකයන් සිදුකර ඇත්තේ ලලිත් ඒකනායක මහතාගේ නිර්දේශයන්ට කොචෝක් කරමින් චූදිත නිලධාරීයාට සුළු දඩුවමක් ලබාදී චූදිතයා නිදහස් කිරීමයි.

මෙම තීරණය එක් අතෙකින් නීතියට සරදම් කිරීමකි.ජයනාත් නැමැත්තාට චෝදනා ගොනු කර තිබෙන්නේ විශ්වවිද්‍යාල ආයතන සංග‍්‍රහයේ විනය පරිච්ඡේදයේ එන බරපතල වැරදි යටතේය.ඒ අනුව එකී බරපතල වැරදි සදහා ලබාදීය යුතු බරපතල දඩුවම් එකී විනය පටිපාටියේ දක්වා ඇත.ඒවා නම් වැටුප් වර්ධක අත්හිටුවීම හෝ අඩු කිරීම, උසස් වීම් සදහා පෙනී සිටීමට නුසුදුස්සෙක් කිරීම, උසස්වීම් අත්හිටුවීම, ජ්‍යෙෂ්ඨතාවය අඩු කිරීම, තත්ත්වයෙන් පහල හෙලීම, අකාර්යක්‍ෂමතාවය මත විශ‍්‍රාම ගැන්වීම, සේවය අවසන් කිරීම හෝ සේවයෙන් නෙරපා හැරීමය.

ආයතන සංග‍්‍රහයේ නිර්වචනයට අනුව අවවාදය දඩුවමක් සේ නොසැලකේ.ඒ අනුව පේරාදෙණිය විශ්වවිද්‍යාලය ජයනාත්ට දඩුවම් නියමකර ඇත්තේ නීතියට ප‍්‍රතිලෝම ලෙසය.සරලව කිවහොත් නීතිය අන්තිම අඩියටම නවලාය.

ලලිත් ඒකනායක මහතා සිය වාර්ථාවේ 40 වන පිටුවේ පළමු ඡේදයේ තද කළු අකුරින් සටහන් කරමින් අවධාරණය කර ඇත්තේ ”චූදිත නිලධාරී යන චෝදනා සදහාද ඉහත සදහන් කරන ලද සියළු හේතූන් මත වෙන වෙනම වරදකරු විය යුතු බවට නිගමනය කරමි.” යනුවෙනි.

එල්ල කර තිබෙන බරපතල චෝදනා 11 න් 10 කටම වෙන වෙනම වරදකරු වීම යනු එක් එක් චෝදනාවන් සදහා වෙන වෙනම දඩුවම් නියම කල යුතු බවය.ඒ අනුව දඩුවම බර වැඩි විය යුතු බව සාමාන්‍ය අවබෝධයන් ඇත්තන්ට වුද වැටහේ.එහෙත් පේරාදෙණි පාලකයන් සුළු දඩුවමක්ලබාදී වැඬේ ෂේප් කිරීමට කටයුතු කර තිබෙන්නේ සාමාන්‍ය අවබෝධයවත් නොමැත්තන් ලෙස බව කණගාටුවෙන් වුවද කිව යුතුව තිබේ.

ඒ අනුව පේරාදෙණි බලධාරීන් ලලිත් ඒකනායක මහතාගේ නිර්දේශයන්ට පයින් ගසා වරද සුළු කොට තකමින් චූදිතයාට දඩුවම් ලබා නොදීමට කටයුතු කර අනාගත පරපුරට ඉතා අනර්ථකාරී පූර්වාදර්ශයක් සපයා තිබෙන අතර එපමණකින් නොනැවතී මෙම දුෂිත පුද්ගලයා තනතුරේ ස්ථීර කරමින් එතෙකින්ද නොනැවතී ඔහුට අංශ පධාන තනතුරද ලබාදී මෙරට නීතිය සහ සදාචාරය පයින් පාගා දමා කටයුතු කර තිබෙන බවත් දැනගත යුතු අයවළුන්ගේ දැන ගැනීම සදහා මෙහි සටහන් කර තබමි.

මතු සම්බන්ධයි