පේරාදෙණිය විශ්වවිද්යාලයේ සනාථන මන්දිර පිවිසුම අසල විශේෂිත සිහිවටන ඵලකයක් තිබේ. පේරාදෙණිය විශ්වවිද්යාලය විවෘත කිරීමේ නිල සිහිවටන ඵලකය වන මෙහි ඉහළින්ම සඳහන් වන්නේ MORE OPEN THAN USUAL යන පාඨයයි. මෙම පාඨය 1954 අප්රේල් 20 වන දින විශ්වවිද්යාලය නිල වශයෙන් විවෘත කිරීමේ උත්සවයේදී එඩින්බරෝ ආදිපාදවරයා හෙවත් පිලිප් කුමරු විසින් සිය කථාවේදී සඳහන් කරන ලද්දකි. එහි වඩාත් පිළිගත් අර්ථය වනුයේ පේරාදෙණිය විශ්වවිද්යාලය “සාමාන්ය තත්ත්වයටත් වඩා විවෘත” වන බවය.
පිලිප් කුමරු එසේ ප්රකාශ කළද, එම වැකිය ගලේ කොටා සනාථන මන්දිරයේ සවිකර තිබුණද, ඇතැම් කාරණා සම්බන්ධයෙන් නම් පේරාදෙණියේ ඇත්තේ විවෘතභාවයක් නොව සැඟවුණ කඳුළු කතාවන්ය. පේරාදෙණියේ ජීවිතය දිනාගත්තු අය පිළිබඳ නොයෙක් වර්ණනාත්මක කතා කියැවෙන්නේ වී නමුදු, මෙම භූමියට පය තැබීමෙන් පසුව එහි වසන ඇතැම් දුර්ජනයන්ගේ පළිගැනීම් හේතුවෙන් විනාශ වී ගිය ජීවිතවල කඳුළු කතාවන් පිළිබඳව නම් කියැවෙන්නේම නැති තරම්ය.
(මෙහිදී “ඇතැම්” යන වචනයට අප බර තබන්නේ, මෙම ස්ථානයේ දෙවිවරුන් වැනි ගුරුවරුන්ද, මනුසත් ගුණයෙන් පිරුණු මිනිසුන්ද බොහෝ සිටිනා බැවිනි. දුර්ජනයන් කිහිපදෙනෙකු සිදුකර ඇති ක්රියාවන් පිළිබඳ අප කතා කරන විට, එම යහපත් මිනිසුන්ගේ සිත් රිදවා ගත යුතු නැති බව අපි තරයේම කියා සිටිමු.)
දක්ෂිකා චංදලී විජේසේකර නම් ශාස්ත්ර පීඨ ශිෂ්යාවගේ කතාව එබන්දකි. අපේ මේ වෑයම තවත් කිසිවෙකුට එබඳු ඉරණමක් අත් නොවීමට මෙම කතාව ලියා තැබීමටය.
කතාව මෙසේය:
මහනුවර, තැන්නේකුඹුර, තේක්කවත්ත ප්රදේශයේ පදිංචිව සිටි දක්ෂිකා චංදලී විජේසේකර සිය පාසල් අධ්යාපනය ලැබුවේ මහනුවර උසස් බාලිකා විද්යාලයෙනි. අධ්යාපන කටයුතු මෙන්ම විෂය බාහිර කටයුතු දෙස ද එකසේ දස්කම් පෑ මෙම දැරිවිය පාසලේ ගුරුවරුන්ගේ නොමඳ ආදරයට ලක්විය. ඇයගේ දක්ෂතාවය හා කැපවීම නිසාම, දිවයිනේ ප්රමුඛතම බාලිකා විද්යාලයක් වූ උසස් බාලිකාවේ ප්රධාන ශිෂ්ය නායිකාව බවට පත්වීමටද ඇයට අවස්ථාව ලැබුණි. ගුරු දෙගුරු සියල්ලන්ම අනාවැකි කියා තිබුණේ දක්ෂිකා සිය නමට සරිලන දීප්තිමත් අනාගතයකට හිමිකම් කියනු ඇති බවටය.
පාසලේ ශිෂ්ය නායිකාවක ලෙස බාහිර වැඩ කටයුතු රාශියක් අතරතුරදී වුවද සිය අධ්යාපන කටයුතු මග නොහැර කටයුතු කළ දක්ෂිකාට, 2015 වර්ෂයේ අධ්යයන පොදු සහතික පත්ර උසස් පෙළ විභාගයෙන් 1.1742 ක Z-ස්කෝර් අගයක් ලබාගෙන විශ්වවිද්යාල වරම් දිනා ගැනීමට හැකියාව ලැබුණි. නියමිත ක්රමවේදයට අනුව විශ්වවිද්යාල ප්රවේශය සඳහා අයදුම් කළද ඇයට මුල් අවස්ථාවේදී පාඨමාලාවක් සඳහා ඇතුළත් වීමට අවස්ථාවක් ලැබී නැත. එහෙත් පසුව අතිරේක බඳවා ගැනීම් (Additional Intake) යටතේ පේරාදෙණිය විශ්වවිද්යාලයේ ශාස්ත්ර පීඨයට ඇතුළත් වීමට ඇයට අවස්ථාව ලැබුණි.
ඒ අනුව 2017 වසරේදී ශිෂ්ය අංක A/15/AI/825 යටතේ පේරාදෙණිය විශ්වවිද්යාලයේ ශාස්ත්ර පීඨයේ ලියාපදිංචිය ලැබූ ඇය සිය විශ්වවිද්යාල අධ්යාපන කටයුතු සතුටින් ආරම්භ කර ඇත.
සතුට දුකට පෙරළුණ හැටි ඊළඟ කොටසින් බලාපොරොත්තු වන්න.
