ලොව සුප්රසිද්ධ මධ්යසාර නිෂ්පාදන සමාගමක් වන ප්රංශයේ පර්නොඩ් රිකාඩ් (Pernod Ricard) සමාගම ඉන්දියාවේ සිල්ලර වෙළඳුන් සමඟ එක්ව සිදුකර ඇති බව කියන අක්රමිකතා සම්බන්ධයෙන් එරට තරඟකාරීත්ව කොමිෂන් සභාව (CCI) විසින් විමර්ශනයක් ආරම්භ කර තිබේ. චිවස් රීගල් (Chivas Regal) සහ ඇබ්සලුට් වොඩ්කා (Absolut Vodka) වැනි ලෝක ප්රකට සන්නාමයන් හිමිකාරීත්වය දරන මෙම සමාගම, සිය වෙළඳපොල කොටස ඉහළ නංවා ගැනීම සඳහා වෙළඳුන් සමඟ එක්ව සදාචාරාත්මක නොවන ගිවිසුම්වලට එළඹ ඇති බවට චෝදනා එල්ල වී ඇත. මෙමගින් අනෙකුත් තරඟකාරී සමාගම්වලට අසාධාරණයක් සිදුවී ඇති බවත් පාරිභෝගිකයින්ගේ තේරීමේ අයිතිය සීමා වී ඇති බවත් ඉන්දීය බලධාරීන් පෙන්වා දෙයි.
ලබා දී ඇති පැමිණිල්ලකට අනුව, පර්නොඩ් සමාගම 2021 වසරේදී නව දිල්ලියේ සිල්ලර වෙළඳුන්ට බැංකු ණය ලබා ගැනීම සඳහා ඩොලර් මිලියන 24 ක ආයතනික ඇපකර ලබා දී ඇති අතර ඊට හිලව් වශයෙන් අදාළ වෙළඳසැල්වල ඇති මධ්යසාර තොගවලින් සියයට 35 ක්ම පර්නොඩ් සන්නාමයන්ට වෙන් කළ යුතු බවට කොන්දේසි පනවා ඇත. මෙම ක්රියාව හරහා පාරිභෝගික ඉල්ලුම හිතාමතාම වෙනත් දිශාවකට යොමු කිරීමට සහ තරඟකාරී සන්නාමයන් වෙළඳපොලෙන් ඉවත් කිරීමට උත්සාහ කර ඇති බව පෙනී යන බව ඉන්දීය විමර්ශන නිලධාරීන් සඳහන් කර තිබේ. මෙය ඉන්දියාවේ පවතින තරඟකාරීත්ව නීති රීති බරපතල ලෙස උල්ලංඝනය කිරීමක් ලෙස සලකනු ලබයි.
කෙසේ වෙතත්, පර්නොඩ් රිකාඩ් සමාගම නිවේදනයක් නිකුත් කරමින් මෙම සියලු චෝදනා තරයේ ප්රතික්ෂේප කර ඇති අතර තමන් සැමවිටම ඉන්දියාවේ නීති රීතිවලට අනුකූලව කටයුතු කරන බව පවසා ඇත. ඉන්දියාව යනු එම සමාගමේ විශාලතම වෙළඳපොලක් වන අතර මෙවැනි විමර්ශනයක් ආරම්භ වීම ඔවුන්ගේ ව්යාපාරික කටයුතුවලට දැඩි බලපෑමක් එල්ල කළ හැකිය. ඉදිරි මාස කිහිපය තුළ ඉන්දීය විමර්ශන ඒකකය විසින් මෙම ගනුදෙනු පිළිබඳව සවිස්තරාත්මක වාර්තාවක් සකස් කිරීමට නියමිත අතර එහි ප්රතිඵල මත සමාගමට දැඩි දඩ මුදල් හෝ වෙනත් නීතිමය ක්රියාමාර්ගවලට මුහුණ දීමට සිදුවනු ඇත.
