බ්රසීලයේ හිටපු ජනාධිපති ජෙයර් බොල්සොනාරෝට නියම වී ඇති වසර 27 ක සිර දඬුවම ලිහිල් කරමින් ඔහුට ඉක්මන් නිදහස ලබා දීමට මග පාදන නව පනතක් ක්රියාත්මක කිරීම එරට ශ්රේෂ්ඨාධිකරණ විනිසුරු ඇලෙක්සැන්ඩර් ද මොරෙස් විසින් තාවකාලිකව තහනම් කර තිබේ. 2022 මැතිවරණ පරාජයෙන් පසු කුමන්ත්රණයක් මෙහෙයවීමේ චෝදනාවට වරදකරු වී දැනට නිවාස අඩස්සියේ පසුවන බොල්සොනාරෝ 2028 වසරේදී නිදහස් වීමට තිබූ අවස්ථාව මෙම අධිකරණ නියෝගයත් සමඟ අහිමි වී ගොස් ඇත. දේශපාලන පක්ෂ කිහිපයක් සහ බ්රසීල පුවත්පත් සංගමය විසින් මෙම පනත ආණ්ඩුක්රම ව්යවස්ථාවට පටහැනි බව පවසමින් ඉදිරිපත් කළ පෙත්සම් සලකා බැලීමෙන් පසු මෙම තීරණය ගෙන තිබේ.
පසුගිය වසරේ අනුමත වූ මෙම මතභේදාත්මක පනත මගින් බොල්සොනාරෝගේ දඬුවම් කාලය වසර දෙකක් දක්වා අඩු කිරීමටත්, 2023 ජනවාරි මාසයේදී බ්රසීලයේ රාජ්ය ආයතනවලට කඩා වැදී කලහ කළ ඔහුගේ ආධාරකරුවන්ගේ දඬුවම් ලිහිල් කිරීමටත් යෝජනා වී තිබුණි. වත්මන් ජනාධිපති ලුල ද සිල්වා මෙම පනතට එරෙහිව සිය නිශේධ බලය (Veto) භාවිතා කළද, එරට කොංග්රස් මණ්ඩලය පසුගිය මාසයේදී එම නිශේධ බලය අභිබවා යමින් පනත බලාත්මක කිරීමට උත්සාහ කළේය. කෙසේ වෙතත්, ශ්රේෂ්ඨාධිකරණය මෙම පනතේ ව්යවස්ථාපිත භාවය පිළිබඳ අවසන් තීරණයක් ගන්නා තෙක් එය ක්රියාත්මක කිරීම නතර කරන ලෙස විනිසුරුවරයා නියෝග කර ඇත.
බොල්සොනාරෝගේ නීතිඥ කණ්ඩායම විසින් ඔහුගේ දඬුවම සම්පූර්ණයෙන්ම අවලංගු කරන ලෙස ඉල්ලා වෙනම පෙත්සමක්ද ශ්රේෂ්ඨාධිකරණයට ඉදිරිපත් කර ඇති අතර, හිටපු ජනාධිපතිවරයා දැනට සෞඛ්ය හේතූන් මත මානුෂීය පදනම යටතේ නිවාස අඩස්සියේ පසුවේ. බ්රසීලයේ දේශපාලන ස්ථාවරත්වයට දැඩි බලපෑමක් එල්ල කරන මෙම අධිකරණ තීන්දුව එරට දේශපාලන කරළිය උණුසුම් කිරීමට සමත් වී තිබේ. ඉදිරි දිනවලදී ශ්රේෂ්ඨාධිකරණය ලබා දෙන අවසන් තීන්දුව මත හිටපු ජනාධිපතිවරයාගේ අනාගතය තීරණය වනු ඇත.
