කොළඹ වරායේ නැගෙනහිර පර්යන්තය (ECT) පෞද්ගලීකරණය කිරීම සඳහා රජය සූදානම් වන බවට තොරතුරු අනාවරණය වී ඇති බවත් එම උත්සාහයට එරෙහිව සියලු බලවේග ඒකාබද්ධ කරමින් දැඩි වෘත්තීය සමිති ක්රියාමාර්ගයකට එළඹෙන බවත් වරාය වෘත්තීය සමිති ඒකාබද්ධ සන්ධානය (PJTUA) අවධාරණය කරයි. වරාය අධිකාරියේ සභාපතිවරයා වෙත ලිපියක් යොමු කරමින් එම සන්ධානය පෙන්වා දෙන්නේ නැගෙනහිර පර්යන්තය පෞද්ගලීකරණය සඳහා පිඹුරුපත් සකස් කරන ලෙස ජනාධිපති ලේකම්වරයා විසින් අදාළ බලධාරීන් වෙත උපදෙස් දී ඇති බවයි. වත්මන් රජය බලයට පත්වීමට පෙර මෙම පර්යන්තය පෞද්ගලීකරණය නොකරන බවට පොරොන්දු ලබා දුන් බව සිහිපත් කරන වෘත්තීය සමිති පෙන්වා දෙන්නේ වසර 27 ක් පුරා පෞද්ගලික අංශය (SAGT) විසින් මෙහෙයවනු ලැබූ පර්යන්තයකින් රජයට ලැබී ඇති මුළු ආදායම ඩොලර් මිලියන 250 කට වඩා අඩු වුවද නැගෙනහිර පර්යන්තය වරාය අධිකාරිය යටතේ ක්රියාත්මක වුවහොත් එහි පළමු මංතීරු 10 තුළින් පමණක් වසරකට ඩොලර් මිලියන 360 ක පමණ ආදායමක් උපයා ගත හැකි බවයි. පර්යන්තය සම්පූර්ණයෙන් ක්රියාත්මක වූ පසු වාර්ෂික ආදායම ඩොලර් මිලියන 700 ඉක්මවනු ඇතැයි ගණන් බලා ඇති අතර පර්යන්තයේ මෙහෙයුම් සඳහා අත්යවශ්ය Straddle Carriers යන්ත්ර මිලදී ගැනීමේ ටෙන්ඩරය වසර එකහමාරක් තිස්සේ ප්රමාද කිරීම පර්යන්තය පෞද්ගලීකරණය කිරීම සඳහා මග සැකසීමේ කුමන්ත්රණයක කොටසක් බවට ද ඔවුහු චෝදනා කරති. නැගෙනහිර පර්යන්තය මෙන්ම දැනට පෞද්ගලික අංශය සතු SAGT පර්යන්තය ද ගිවිසුම් කාලය අවසානයේ වරාය අධිකාරිය යටතට ගෙන මෙහෙයුම් සිදු කිරීම රටට වඩාත් වාසිදායක බව පවසන වෘත්තීය සමිති සන්ධානය මේ පිළිබඳව වෘත්තීය සමිති සහ විධායක නොවන සේවකයන් දැනුවත් කිරීමේ වැඩසටහනක් වහාම පවත්වන ලෙස වරාය සභාපතිවරයාගෙන් ඉල්ලා සිටියි.
