රටේ සියලුම දරුවන්ට සමාන අධ්යාපන අවස්ථා ලබාදීමට රජය උපරිමයෙන් කැපවී සිටින අතර, ජනාධිපති අරමුදල ඉතිහාසයේ පළමු වතාවට සැබෑ ලෙසම මහජනතාවට සේවය කරන ආයතනයක් බවට පත් කරන බව අග්රාමාත්ය ආචාර්ය හරිනි අමරසූරිය මෙනෙවිය පවසයි. කොළඹ අරලියගහ මන්දිරයේදී අද (11) පැවැති “සරසවි දිරිය අභිමන් 2026” ශිෂ්යත්ව ප්රදානෝත්සවයට එක්වෙමින් අග්රාමාත්යවරිය මේ බව කියා සිටියාය.
එහිදී වැඩිදුරටත් අදහස් දැක්වූ අගමැතිනිය, ඕටිසම් (Autism) හෝ ඩිස්ලෙක්සියාව (Dyslexia) වැනි විශේෂ අවශ්යතා සහිත කිසිදු දරුවෙකු රටේ අධ්යාපන පද්ධතියෙන් බැහැර නොකළ යුතු බව අවධාරණය කළාය. විශේෂ අවශ්යතා සහිත සිසුන් සඳහා විශ්වවිද්යාල සහ පොදු ප්රවාහන පද්ධති තුළ පහසුකම් පුළුල් කිරීමට රජය පියවර ගනිමින් සිටින බවත්, ඩිජිටල් තාක්ෂණය සහ නව යටිතල පහසුකම් උපයෝගී කරගනිමින් සැමට පොදු වූ අධ්යාපන ක්රමයක් (Inclusive Education) රට තුළ බිහි කරන බවත් ඇය පැවසුවාය. ආබාධිත තත්ත්වයන් සහිත සිසුන් යනු රටේ තිරසාර සංවර්ධනයට දායක විය හැකි වටිනා මානව සම්පතක් බව පෙන්වා දුන් අග්රාමාත්යවරිය, සෑම පුද්ගලයෙකුගේම වටිනාකම හඳුනන ශිෂ්ට සම්පන්න සමාජයක් ගොඩනැඟීම රජයේ අවසන් අරමුණ බව ද වැඩිදුරටත් ප්රකාශ කළාය.
