ඉන්දීය අග්රාමාත්ය නරේන්ද්ර මෝදි මහතාගේ එක්සත් අරාබි එමීර් රාජ්යයේ නිල සංචාරය අතරතුර දෙරට අතර උපායමාර්ගික ආරක්ෂක හවුල්කාරිත්වයක් සඳහා වන රාමුවකට එකඟතාව පළ වී තිබේ. ඉරාන යුද්ධය හේතුවෙන් කලාපීය නොසන්සුන්තාවයක් පවතින පසුබිමක මෙම තීරණය ගෙන ඇති අතර දෙරට අතර පවතින සබඳතා තවදුරටත් ගැඹුරු කිරීම මෙහි අරමුණයි.ඉන්දියාව සහ එක්සත් අරාබි එමීර් රාජ්යය ආරක්ෂක කර්මාන්ත සහයෝගීතාව, නව නිපැයුම්, උසස් තාක්ෂණය, පුහුණු කිරීම්, නාවික ආරක්ෂාව, සයිබර් ආරක්ෂණය සහ තොරතුරු හුවමාරු කර ගැනීම පිළිබඳව ගැඹුරින් කටයුතු කිරීමට එකඟ වී ඇත.උපායමාර්ගික ඛනිජ තෙල් සංචිත සහ ද්රව පෙට්රෝලියම් ගෑස් (LPG) සැපයීම සම්බන්ධයෙන් ද දෙරට අතර ගිවිසුම් අත්සන් කෙරිණි. අබුඩාබි රාජ්ය තෙල් සමාගම (ADNOC) ඉන්දියාවේ සිය බොරතෙල් ගබඩා කිරීමේ ධාරිතාව බැරල් මිලියන 30 දක්වා වැඩි කිරීමටත්, එක්සත් අරාබි එමීර් රාජ්යයේ ෆුජයිරාහි ඉන්දියාවේ උපායමාර්ගික සංචිත සඳහා බොරතෙල් ගබඩා කිරීමට ඇති හැකියාව පිළිබඳවත් මෙහිදී සාකච්ඡා වී තිබේ.
පසුගිය මාසයේදී එක්සත් අරාබි එමීර් රාජ්යය ඔපෙක් (OPEC) සංවිධානයෙන් ඉවත් වීමට ගත් තීරණය හේතුවෙන් ඔවුන්ගේ තෙල් නිෂ්පාදනය ඉහළ යනු ඇතැයි අපේක්ෂා කෙරෙන අතර, එය ඉන්දියාව වැනි තෙල් ආනයනය කරන රටවලට වාසිදායක වනු ඇත.ඉරාන යුද්ධය හේතුවෙන් හෝමුස් සමුද්ර සන්ධිය වසා දැමීමත් සමඟ ගෝලීය බලශක්ති වෙළඳපොළට දැඩි බලපෑම් එල්ල වූ අතර, පසුගිය මාසයේ ඇති වූ සටන් විරාමයට පෙර රුසියානු ප්රහාර එක්සත් අරාබි එමීර් රාජ්යය ඇතුළු ගල්ෆ් කලාපයට ද එල්ල විය.
