මෑතකදී පවත්වන ලද මාධ්ය හමුවකදී සිදුකළ ආන්දෝලනාත්මක ප්රකාශයක් සම්බන්ධයෙන් ප්රකාශයක් සටහන් කරගැනීම සඳහා හිටපු අමාත්ය සහ සර්වජන බලය පක්ෂයේ ජාතික සංවිධායක දිලුම් අමුණුගම මහතා පොලිසිය වෙත කැඳවා තිබේ. දැනට අධිකරණය හමුවේ විභාග වන ළමා අපයෝජන නඩුවකට අදාළ බාලවයස්කාර දැරියකට හානි වන අයුරින් සිදුකළ ප්රකාශයන් සම්බන්ධයෙන් ලද පැමිණිලි කිහිපයක් මත මෙම විමර්ශනය ආරම්භ කළ බව පොලිස් මාධ්ය ප්රකාශක එෆ්. යූ. වුට්ලර් මහතා පවසයි.
අටමස්ථානාධිපති හිමිනමකගේ අත්අඩංගුවට ගැනීම සහ රඳවා තබා ගැනීම සිදුව ඇත්තේ “ගණිකාවකගේ” ප්රකාශයක් මත බවට තම පක්ෂයට තොරතුරු ලැබී ඇතැයි දිලුම් අමුණුගම මහතා මාධ්ය හමුවේදී ප්රකාශ කිරීමත් සමඟ මෙම දැඩි ආන්දෝලනාත්මක තත්ත්වය නිර්මාණය විය. වයස අවුරුදු 15ක බාලවයස්කාර දැරියක් සම්බන්ධ නඩුවක් උදෙසා මෙවැනි වචන භාවිත කිරීම පිළිබඳව සමාජ මාධ්ය ඔස්සේ දැඩි විවේචන එල්ල වූ අතර, ඉන් අනතුරුව අමුණුගම මහතා මාධ්ය හමුවක් පවත්වමින් කියා සිටියේ තම ප්රකාශය අදාළ දැරිය ඉලක්ක කරගෙන සිදුකළ එකක් නොවන බවත්, එය සමාජ මාධ්ය විසින් විකෘති කර ඇති බවත්ය. තමන් එම වචනය භාවිත කළේ නිට්ටඹුව ප්රදේශයේ සිදුවූ වෙනත් සිදුවීමකට අදාළව ලැබුණු තොරතුරක් මත බව පැවසූ ඔහු, එමඟින් අදාළ දැරියට හෝ ඇයගේ පවුලේ අයට සිත් රිදවීමක් සිදුවූයේ නම් තමන් කනගාටුව පළ කර සමාව අයදින බව ද සඳහන් කළේය.
මේ අතර, කාන්තා හා ළමා කටයුතු අමාත්යාංශය විසින් ද පොලිස්පතිවරයා වෙත නිල වශයෙන් ලේඛනයක් යොමු කරමින් ඉල්ලා ඇත්තේ මෙම ප්රකාශය පිළිබඳව වහාම පරීක්ෂණයක් පවත්වන ලෙසයි. අදාළ නඩුවේ වින්දිතයා මෙන්ම ප්රධාන සාක්ෂිකරුවෙකු ද වන බාලවයස්කාර දැරියට මෙමඟින් දැඩි අගතියක් සිදුවිය හැකි බවත්, මෙය 2023 අංක 10 දරන අපරාධයකට ගොදුරු වූවන් සහ සාක්ෂිකරුවන් ආරක්ෂා කිරීමේ පනත යටතේ දඬුවම් ලැබිය හැකි වරදක් විය හැකි බවත් අමාත්යාංශය පෙන්වා දෙයි. තවද, අදාළ දැරිය නැවත වරක් මානසික කීඩාවට ලක්වීම වැළැක්වීම සඳහා මෙම වීඩියෝ දර්ශන තවදුරටත් සංසරණය කිරීමෙන් වළකින ලෙස බලධාරීන් මාධ්ය ආයතනවලින් සහ සමාජ මාධ්ය පරිශීලකයන්ගෙන් ඉල්ලා සිටියි.
