ජලාශ්රිත අනතුරුවලට ලක්වන පුද්ගලයින්ගේ ජීවිත ආරක්ෂා කිරීම සඳහා විශේෂ පුහුණුවක් ලැබූ අතිදක්ෂ පොලිස් ජීවිතාරක්ෂකයින් කණ්ඩායමක් ඊයේ (17) සිය පුහුණු පාඨමාලාව සාර්ථකව අවසන් කළහ. පොලිස් නාවික කොට්ඨාසය විසින් මැයි 19 සිට ජූලි 17 දක්වා පවත්වන ලද මෙම අතරමැදි පාඨමාලාව සඳහා නිලධාරීන් 75 දෙනෙකු සහභාගී වූ අතර, ඉන් නිලධාරිනියන් සිව්දෙනෙකු ඇතුළු නිලධාරීන් 66 දෙනෙකු සහතික ලබා ගැනීමට සමත් වූහ.
නාරාහේන්පිට පොලිස් ක්රීඩා සංකීර්ණයේදී පැවැති විසිරයාමේ උත්සවයේදී මෙම නිලධාරීන්ට තම වෘත්තීය නිපුණතාවය තහවුරු කෙරිණි. දින දෙකකට ආසන්න කාලයක් පැවැති මෙම පාඨමාලාව තුළදී ඔවුනට පිහිනුම් කුසලතා, ගිලෙන පුද්ගලයින් බේරාගැනීම, ප්රථමාධාර ලබාදීම, රළු මුහුදේ හා ගංගාවල ක්රියාත්මක වන ආකාරය, හදිසි ගංවතුර සහ උස් ස්ථානවලින් ජලයට පැන පුද්ගලයින් බේරා ගැනීම වැනි අභියෝගාත්මක පුහුණුවක් ලබා දී ඇත. ඊට අමතරව ගිනි නිවීම සහ යාත්රා පැදවීම පිළිබඳව ද ඔවුන් දැනුම ලබා ඇත.
මෙම පුහුණුව සඳහා ගල්කිස්ස, වරාය නගරය, හික්කඩුව මුහුදු තීරයන් මෙන්ම කැළණි ගඟ, ගිං ගඟ සහ ඉබ්බන්කටුව ජලාශය ආශ්රිත ප්රදේශ භාවිත කර තිබීම විශේෂත්වයකි. මෙලෙස පුහුණුව ලැබූ නිලධාරීන් ඉදිරියේදී දිවයින පුරා ජලාශ්රිත ප්රදේශ සහ මුහුදු තීර ආශ්රිතව රාජකාරියේ නිරත වෙමින්, දේශීය මෙන්ම විදේශීය සංචාරකයින්ගේ ජීවිත ආරක්ෂා කිරීම සඳහා සිය දායකත්වය ලබා දෙනු ඇත.
