2015 – 2019 කාලසීමාව තුළ රජයේ ආධාර යටතේ අඩු ආදායම්ලාභී පවුල් වෙනුවෙන් ආරම්භ කළ නිවාස ව්යාපෘති රැසක් පොළොන්නරුව දිස්ත්රික්කය තුළ අතහැර දමා විනාශ වෙමින් පවතින බව අනාවරණය වී තිබේ.
නිවාස හා ඉදිකිරීම් නියෝජ්ය අමාත්යවරයා විසින් ඊයේ (23) වැලිකන්ද ප්රදේශයේ සිදුකළ නිරීක්ෂණ චාරිකාවකදී මෙම තත්ත්වය හඳුනාගෙන ඇත. එහිදී අනාවරණය වී ඇත්තේ නිවාස සංවර්ධන අධිකාරිය මගින් තෝරාගත් ප්රතිලාභීන් සඳහා ලබා දී ඇත්තේ එක් වාරිකයක් පමණක් බවයි. මුදල් නොමැති වීම නිසා ඉදිකිරීම් අතරමග නැවතී ඇති අතර එම නිවාස මේ වන විට වනයට බිලිවී විනාශ වෙමින් පවතී.
මෙහිදී ඇතැම් නිවාස ප්රතිලාභීන් ලෙස දේශපාලන සම්බන්ධතා ඇති, දැනටමත් ඉඩම් සහ නිවාස හිමි පුද්ගලයන් තෝරාගෙන ඇති බවට ද චෝදනා එල්ල වී තිබේ. බුරුත, අසේලපුර සහ බණගම කාලිංගවිල යන ප්රදේශවල මෙලෙස අතහැර දැමූ නිවාස රැසක් නියෝජ්ය අමාත්යවරයාගේ නිරීක්ෂණයට ලක් විය.
පවතින වාර්තාවලට අනුව 2015 – 2019 කාලසීමාව තුළ දිවයින පුරා සැලසුම් කර තිබූ නිවාස 64,407කින් සම්පූර්ණ කර ඇත්තේ නිවාස 10,532ක් පමණි.
පවතින අඩුපාඩු සොයා බැලීමට විශේෂ කමිටුවක් පත් කරන ලෙසත්, 2026 වසර සඳහා වෙන් කර ඇති ප්රතිපාදන යොදා ගනිමින් සැබෑ නිවාස අවශ්යතා ඇති පවුල් වෙනුවෙන් මෙම ඉදිකිරීම් කටයුතු යළි ආරම්භ කරන ලෙසත් නියෝජ්ය අමාත්යවරයා මෙහිදී නිලධාරීන්ට උපදෙස් ලබා දුන්නේය.
