ඉදිරි කාලය තුළ විදුලි උත්පාදනය සඳහා අවශ්ය ගල් අඟුරු සපයා ගැනීමේ බරපතල ගැටලුවක් මතුව ඇති බවත්, මේ හේතුවෙන් ඉදිරි දින 57ක කාලය තුළ ගිගාවොට් පැය 150ක පමණ විදුලි හිඟයක් ඇතිවීමේ අවදානමක් පවතින බවත් සූර්ය බල ඉදිකිරීම් සංගමයේ සභාපති ශ්යාම් පතිරාජ මහතා අනාවරණය කරයි. විදුලිබල මණ්ඩලය විසින් මහජන උපයෝගිතා කොමිසම වෙත ඉදිරිපත් කර ඇති දත්තවල සත්යතාව පිළිබඳව ද ඔහු මෙහිදී දැඩි ලෙස ප්රශ්න කර සිටියේය.
පතිරාජ මහතා පෙන්වා දෙන්නේ මෙගාවොට් 150ක පමණ පවතින සැබෑ හිඟය වසා ගැනීමට බලධාරීන් වැරදි තොරතුරු ඉදිරිපත් කරන්නේද යන්න පිළිබඳව බරපතල සැකයක් පවතින බවයි. පවතින ගල් අඟුරු තොග සීඝ්රයෙන් අවසන් වෙමින් පවතින අතර, ඇණවුම් කර ඇති ඉතිරි ගල් අඟුරු නැව් පහ මෙරටට ලැබේද යන්න පිළිබඳව ද ඔහු සැක පළ කරයි. විශේෂයෙන්ම ඉදිරියට එළඹෙන්නේ වාරකම් කාලය (රළු මුහුද සහිත කාලය) බැවින් එම නැව්වලින් ගල් අඟුරු ගොඩබෑම තවදුරටත් අසීරු වනු ඇති බව ඔහු පෙන්වා දෙයි.
මෙම තත්ත්වය හමුවේ ඇතිවන විදුලි හිඟය සහ පිරිවැය ඉහළ යාම හේතුවෙන් තවත් මාස තුනක් වැනි කෙටි කාලයක් ඇතුළත නැවත වරක් විදුලි ගාස්තු සංශෝධනයකට යාමට බලධාරීන්ට සිදුවනු ඇති බවට ද පතිරාජ මහතා අනතුරු ඇඟවීය. විදුලිබල ක්ෂේත්රයේ පවතින මෙම අස්ථාවර භාවය හේතුවෙන් පාරිභෝගිකයන්ට ඉදිරියේදී තවදුරටත් අපහසුතාවන්ට මුහුණ දීමට සිදුවනු ඇතැයි ඔහු වැඩිදුරටත් සඳහන් කළේය.
