මී උණ (ලෙප්ටොස්පයිරෝසිස්) සහ රුධිරගත පිළිකා ඇතුළු රෝග රැසකට ප්රතිකාර කිරීම සඳහා යොදාගන්නා රුපියල් මිලියන 50කට අධික වටිනාකමකින් යුත් අතිනවීන වෛද්ය යන්ත්ර දෙකක් සෞඛ්ය අමාත්යාංශය වෙත පරිත්යාග කර තිබේ. ප්රිමියම් ඉන්ටර්නැෂනල් පුද්ගලික සමාගම විසින් සිදුකළ මෙම පරිත්යාගය එම සමාගමේ අධ්යක්ෂ මහේෂ් ප්රනාන්දු සහ සාමාන්යාධිකාරී අචල මෝසස් යන මහත්වරුන් විසින් සෞඛ්ය අමාත්ය වෛද්ය නලින්ද ජයතිස්ස මහතා වෙත නිල වශයෙන් භාර දෙන ලදී.
ජර්මනියේ නිෂ්පාදිත මෙම අතිනවීන යන්ත්ර මගින් ‘ප්ලාස්මා දේහ විච්ඡේදන’ (Plasmapheresis) ප්රතිකාර ක්රමය හරහා රෝග රැසකට විසඳුම් ලබාදිය හැකිය. විශේෂයෙන්ම මෙරට බහුලව වාර්තාවන මී උණ, සර්ප දෂ්ඨනයට ලක්වූ රෝගීන්ගේ සංකූලතා පාලනය, ප්රතිශක්තීකරණ පද්ධතිය ආශ්රිත රෝග සහ අවයව බද්ධ කිරීමට පෙර හෝ පසු රෝගීන්ට අවශ්ය විශේෂ සත්කාර සැපයීම මේ හරහා සිදුකෙරේ. මීට අමතරව රුධිර පිළිකා සහ තැලසීමියා රෝගීන්ට අවශ්ය සෛල බද්ධ කිරීමේ සැත්කම් සඳහාද මෙම යන්ත්ර සෘජුවම දායකත්වය සපයයි.
දේශීය සෞඛ්ය ක්ෂේත්රයේ ප්රගමනය වෙනුවෙන් පෞද්ගලික අංශයේ දායකත්වය ලබාදීමේ අරමුණින් මෙම පියවර ගත් බව ප්රිමියම් ඉන්ටර්නැෂනල් සමාගම පවසයි. මෙම නවීන තාක්ෂණික පහසුකම් මෙරට රජයේ රෝහල් පද්ධතියට එක්වීම තුළින් රෝගී සත්කාරක සේවා වඩාත් කාර්යක්ෂම හා ගුණාත්මක වනු ඇතැයි අපේක්ෂා කෙරේ.
