ජාතික ජනබලවේගය විසින් නුවරඑළිය සහ මහරගම ප්රදේශවල සංවිධානය කර තිබූ මැයි දින රැලියන් අමතමින් ජනාධිපති අනුර කුමාර දිසානායක මහතා අවධාරණය කළේ 2026 වසර යනු දූෂිතයන්ට සහ වංචනිකයන්ට සිරදඬුවම් නියම වන වසරක් බවයි. මේ වන විටත් අපරාධ පරීක්ෂණ දෙපාර්තමේන්තුව සහ අල්ලස් කොමිසම ශක්තිමත් කර ඇති බව ඔහු මෙහිදී පැවසීය.
හිටපු අමාත්යවරුන් භාවිත කළ නිවාස පවා අධිකරණ හා අල්ලස් කොමිසමේ කටයුතු සඳහා පවරා දී ඇති අතර මේ මස තුළ පමණක් නඩු දහයක් විභාගයට ගැනෙන බව ජනාධිපතිවරයා හෙළි කළේය. ඉන් එක් නඩුවක තීන්දුව නුදුරේදීම ප්රකාශයට පත්කිරීමට නියමිත බවත්, පවුල් පසුබිම මත කිසිදු භේදයක් නොසලකා සියලු දෙනාටම නීතිය එක හා සමානව ක්රියාත්මක කරන බවත් ඔහු වැඩිදුරටත් කියා සිටියේය.
මැදපෙරදිග යුදමය තත්ත්වය හේතුවෙන් ඉදිරියේදී ඉන්ධන මිලෙහි සුළු වැඩිවීමක් සිදුවිය හැකි වුවද, රජය මේ වන විටත් ඩීසල් ලීටරයක් සඳහා රුපියල් සියයක සහනාධාරයක් ලබා දෙන බව ඔහු පැහැදිලි කළේය. විදුලි බිල ඉහළ දැමීමට සිදුවුවහොත් පාරිභෝගිකයන්ගෙන් සියයට අනූහයකට ඉන් බලපෑමක් නොවන පරිදි සහන සැලසීමට රුපියල් කෝටි එක්දහස් පන්සියයක් වෙන් කර ඇති අතර, තම පාලන කාලය තුළ විදුලි ගාස්තු තුනෙන් එකකින් අඩු කරන බවද ඔහු යළි තහවුරු කළේය.
වතුකරයේ නිවාස ඉදිකිරීම සඳහා ලබාදෙන මුදල රුපියල් ලක්ෂ දහසයක සිට ලක්ෂ විසිපහ දක්වා ඉහළ නංවා ඇති අතර ඉඩම් අයිතිය ලබාදීමටද රජය මැදිහත් වෙයි. තවද, දෙමළ මාධ්ය විද්යාපීඨවල පවතින සියලුම ගුරු පුරප්පාඩු කඩිනමින් පිරවීමට අධ්යාපන අමාත්යාංශය සමග සාකච්ඡා කර ඇති බවද ජනාධිපතිවරයා නුවරඑළිය රැලියේදී ප්රකාශ කළේය.
