ජාතියේ වටිනාම සම්පත වන දරුවන්ගේ ජීවිත සුරක්ෂිත කිරීම සහ ඔවුන්ගේ අනාගත අපේක්ෂා සාක්ෂාත් කර දීම වත්මන් රජයේ පරම වගකීම බව ලෝක ළමා දිනය වෙනුවෙන් විශේෂ සුබපැතුම් පණිවුඩයක් නිකුත් කරමින් ජනාධිපති අනුර කුමාර දිසානායක මහතා අවධාරණය කරයි. හුදෙක් අනාගතය සඳහා දරුවන් සූදානම් කිරීම පමණක් නොව, වර්තමානයේදීම ඔවුන්ගේ හඬට සවන් දෙමින්, හැකියාවන්ට පූර්ණ අවකාශය සලසා දෙන සුරක්ෂිත පරිසරයක් නිර්මාණය කිරීම ජාතික මට්ටමින් ඉටුකළ යුතු අත්‍යවශ්‍ය මෙහෙවරක් බව ජනාධිපතිවරයා පෙන්වා දෙයි. කිසිදු දරුවෙකුගේ ජාතිය, ආගම, ආර්ථික තත්ත්වය හෝ භූගෝලීය පසුබිම අධ්‍යාපනයට බාධාවක් නොවන අයුරින් සමාන ප්‍රවේශයක් සහ සමාජ ආරක්ෂණයක් තහවුරු කිරීම රජයේ ප්‍රමුඛතාව වී ඇති බව මෙහිදී වැඩිදුරටත් සඳහන් කෙරිණි.
දෙමාපියන්ට බරක් නොවන, දරුවන්ට පීඩාවක් නොවී නව ලෝකයේ අභියෝග ජයගත හැකි කුසලතා පදනම් කරගත් අධ්‍යාපන ප්‍රතිසංස්කරණ මේ වන විටත් රට තුළ ක්‍රියාවට නංවා ඇති අතර, අස්ථාවර ආර්ථිකයක සෙවණැලිවලින් තොර සුන්දර ළමා වියක් උරුම කර දීම සඳහා රජය ආර්ථිකය නිවැරදි දිශානතියකට මෙහෙයවමින් සිටී. විශේෂයෙන්ම, වර්තමාන සමාජය මුහුණපාන බරපතල උවදුරක් වන විෂ මත්ද්‍රව්‍ය ජාලයෙන් දරු පරපුර මුදා ගැනීම සඳහා ‘රටම එකට’ ජාතික මෙහෙයුම ක්‍රියාත්මක කර ඇති බව පෙන්වා දෙන ජනාධිපතිවරයා, දරුවන්ට එරෙහි සියලු ආකාරයේ අපයෝජන සහ හිංසන මැඩලීම සඳහා වන නීතිමය සහ ආයතනික යාන්ත්‍රණයන් තවදුරටත් ශක්තිමත් කිරීමට කැපවී සිටින බව ප්‍රකාශ කරයි.
“මනසින් සවිමත් – දරුවන් පොහොසත්” යන කාලෝචිත තේමාව පෙරදැරිව කාන්තා සහ ළමා කටයුතු අමාත්‍යාංශය විසින් සංවිධානය කර ඇති ජාතික ළමා දින සතියේ වැඩසටහන් අගය කරන ජනාධිපතිවරයා, අධ්‍යාපන ශිෂ්‍යත්ව පුළුල් කිරීමේ සිට ළමා සංවර්ධන මධ්‍යස්ථානවල රැකවරණය ලබන දරුවන්ගේ අනාගතය සුරක්ෂිත කිරීම දක්වා වූ පුළුල් වැඩසටහන් හරහා සෑම දරුවෙකුටම අභිමානවත් හෙට දවසක් උරුම කර දීමට රජය අඛණ්ඩව කටයුතු කරන බව තහවුරු කරයි. දරුවන් වෙනුවෙන් ගොඩනඟන මෙම සුරක්ෂිත හා සාධාරණ සමාජ පසුබිම ඔස්සේ මෙරට සමස්ත දරු පරපුරේ මානසික හා භෞතික යහපැවැත්ම තහවුරු වනු ඇතැයි ජාතික මට්ටමින් දැඩි අපේක්ෂාවක් පවතී.
