අනුරාධපුර දිස්ත්රික්කයේ පදවිය, කැබිතිගොල්ලෑව, හොරොව්පතාන සහ කහටගස්දිගිලිය යන ප්රාදේශීය ලේකම් කොට්ඨාසවල පවුල් 67,000ක් සඳහා පිරිසිදු පානීය ජලය ලබා දීමේ අරමුණින් ක්රියාත්මක කෙරෙන අනුරාධපුර උතුර ජල සම්පාදන ව්යාපෘතියේ දෙවන අදියර ජනාධිපති අනුර කුමාර දිසානායක මහතාගේ ප්රධානත්වයෙන් ඊයේ (10) ආරම්භ කෙරිණි.
ජපාන ජාත්යන්තර සහයෝගීතා ආයතනයේ (JICA) සහ ශ්රී ලංකා රජයේ මූල්ය දායකත්වයෙන් ක්රියාත්මක මෙම ව්යාපෘතිය, හඳුනා නොගත් වකුගඩු රෝගය (CKD) බහුල ප්රදේශවල ජනතාවට සහනයක් ලබා දීම වෙනුවෙන් දියත් කෙරෙන හුදු යටිතල පහසුකම් ව්යාපෘතියක් පමණක් නොව, ජනතාවගේ ජීවත්වීමේ අයිතිය තහවුරු කිරීමක් බව ජනාධිපතිවරයා මෙහිදී අවධාරණය කළේය.
ජනාධිපතිවරයා මෙහිදී පෙන්වා දුන්නේ ගොවි ජනතාවට වඩා හොඳ ජීවිතයක්, සමාජ වටිනාකමක් සහ ගෞරවයක් හිමි කර දීම රජයේ අරමුණ බවයි. පොහොර සහනාධාරය දෙගුණයකින් ඉහළ නැංවීම, වගා හානි සඳහා ඉතිහාසයේ වැඩිම වන්දි මුදලක් ලබා දීම සහ වී මිලදී ගැනීම සඳහා ඉතිහාසයේ වැඩිම මුදල් වෙන් කිරීම මේ වන විට සිදු කර ඇත. රටේ පවුල් ලක්ෂ 10කට අලුතින් පානීය ජල සැපයුම් ලබා දීම සඳහා රුපියල් කෝටි 2,000ක් වැය කරමින් නව ජල ව්යාපෘති 22ක් ලබන වසරේ ආරම්භ කිරීමට සැලසුම් කර ඇති බවත්, පහළ මල්වතු ඔය ව්යාපෘතිය යළි ආරම්භ කරමින් උතුරු මැද මහ ඇළ ව්යාපෘතිය කඩිනමින් අවසන් කර මහකනදරා වැව දක්වා ජලය ගෙන යාමට කටයුතු යොදා ඇති බවත් ඔහු සඳහන් කළේය.
මෙම අවස්ථාවේදී අදහස් දැක්වූ අමාත්ය වසන්ත සමරසිංහ මහතා මෙය බිලියන 51ක් වැය කරමින් ක්රියාත්මක වන ලංකාවේ දෙවන විශාලතම ජල ව්යාපෘතිය බව ප්රකාශ කළ අතර, ජල සම්පාදන ක්ෂේත්රයේ විශාල පුනර්ජීවනයක් ඇති කරමින් ඉදිරියේදී දිවයින පුරා ජල ව්යාපෘති ගණනාවක් ජනතා අයිතියට පත් කරන බව අමාත්ය වෛද්ය සුසිල් රණසිංහ මහතා පැවසීය. ශ්රී ලංකාවේ ආර්ථික ප්රකෘතිය සඳහා ජපානය ස්ථාවර හවුල්කරුවෙකු ලෙස අඛණ්ඩව කටයුතු කරන බව පවසමින්, රජයේ ශක්තිමත් සාර්ව ආර්ථික ප්රතිපත්තිය හේතුවෙන් ශ්රී ලංකාවේ ආර්ථිකය මේ වන විට ස්ථාවර වී ඇති බව ශ්රී ලංකාවේ වැඩබලන ජපාන තානාපති KAMOSHIDA Naoaki මහතා වැඩිදුරටත් සඳහන් කළේය.
මෙම අවස්ථාවට උතුරු මැද පළාත් ආණ්ඩුකාර වසන්ත ජිනදාස මහතා ඇතුළු මහජන නියෝජිතයින්, රාජ්ය නිලධාරීන් සහ ප්රදේශවාසී ජනතාව එක්ව සිටියහ.
