ඕනෑම පරීක්ෂණයකදී යම් පුද්ගලයකුගේ නමක් කියවුණහොත්, තරාතිරම නොබලා එම තැනැත්තාගෙන් කටඋත්තරයක් ලබාගැනීම අනිවාර්ය බව ජනාධිපති අනුර කුමාර දිසානායක මහතා අවධාරණය කරයි. ජනාධිපතිවරයා මේ බව ප්රකාශ කළේ මාතලේ දිස්ත්රික් ලේකම් කාර්යාලයේදී අද (12) පෙරවරුවේ පැවැති විශේෂ දිස්ත්රික් සම්බන්ධීකරණ කමිටු රැස්වීමට එක්වෙමිනි.
පරීක්ෂණයකදී නමක් කියවුණු පමණින් එය මහා ව්යසනයක් ලෙස සලකන සංස්කෘතියක් රටට අවශ්ය නොවන බවත්, ප්රකාශයක් ලබාගැනීම සාමාන්ය නීතිමය ක්රියාවලියක් බවත් ඔහු පෙන්වා දුන්නේය. නීතියට ඉහළින් කිසිවකු නොමැති බවත්, තමා පිළිබඳව වුවද යම් කරුණක් අනාවරණය වුවහොත් තමාගෙන් ද ප්රකාශයක් ලබාගත හැකි බවත් ජනාධිපතිවරයා මෙහිදී සඳහන් කළේය. නීතිය ඉදිරියේ සෑම දෙනාම සමාන වන සහ නීතියට ගරු කරන සංස්කෘතික පරිවර්තනයක් ඇති කිරීමට සියලු දෙනා එක්විය යුතු බව ඔහු වැඩිදුරටත් අවධාරණය කළේය.
මෙම රැස්වීමේදී “දිට්වා” සුළි කුණාටුව හේතුවෙන් විපතට පත් වූ ජනතාවට වන්දි ගෙවීම් කඩිනම් කිරීම සහ ඔවුන්ගේ ජන ජීවිතය යථා තත්ත්වයට පත් කිරීම සඳහා ගෙන ඇති පියවර පිළිබඳව ද ජනාධිපතිවරයා දීර්ඝ වශයෙන් විමසා බලන ලදී.
